Jorge Martin, kampioni aktual i MotoGP, pas fitores ndaj Pecco Bagnaia në duelin e fundit të kampionatit, është një nga pilotët më të spikatur ndërkombëtar, i njohur jo vetëm për aftësitë e tij të padiskutueshme në garat me shpejtësi mbi 360 km/h, por edhe për thjeshtësinë e tij jashtë pistës. Ai nuk ka fshehur kurrë origjinën e tij të përulur dhe vështirësitë ekonomike që ka përjetuar familja e tij kur ai ishte një fëmijë i talentuar i mini-moto. Sakrificat e prindërve të tij ishin vendimtare për t’i dhënë mundësinë që të zhvillonte talentin dhe të ndërtonte një karrierë në motociklizëm.
Sot, pavarësisht pasurisë që ka arritur përmes pagave dhe sponsorëve, përvoja e atyre vështirësive e mban me këmbë në tokë. Por nuk ka qenë gjithmonë kështu. As ai nuk i shpëtoi tundimit që përjetojnë shumë të rinj kur papritur gjejnë veten duke fituar shuma të mëdha parash. Në një intervistë për podcast-in spanjoll ‘Tengo un Plan’, Martin rrëfeu se kur filloi të shfaqte rezultate të mëdha në MotoGP, në vitin 2021, ai humbi për një moment drejtimin.
VARËSI NGA FESTAT...
“Kur mbërrita në MotoGP, isha beqar, fitova garën time të parë në Austri… dhe fillova të festoja. Nuk kisha dalë kurrë shumë, por që nga ai moment fillova të shkoja në Barcelonë për festa. Vija të dielën pas garës, shkoja në Barcelonë për të festuar, kthehesha në Andorrë për të stërvitur, dhe fundjavën tjetër përsëri në Barcelonë. Pastaj një garë tjetër, dhe kështu me radhë,” rrëfeu ai.
Lexo më tej: Video/ MotoGP, çmenduri e Marquez: futet keq në kthesë e merr përpara Oliveira, fishkëllima nga publiku
Kjo mënyrë jetese, edhe pse sipas tij nuk ndikoi në rezultatet në pistë, nuk ishte në përputhje me standardet e një sportisti profesionist që synon objektiva madhore. Por ishin pikërisht origjina e tij e përulur dhe sakrificat e familjes ato që e kthyen në rrugën e duhur.
FATURA E ÇMENDUR
Martin zbuloi se një episod i veçantë i dha shtysën për t’u kthyer në rrënjët e tij: një faturë e ekzagjeruar që pagoi në një klub nate pas një tjetër nate feste. “Isha ende i shpejtë dhe gjithçka shkonte mirë. Por erdhi një moment kur pashë një faturë në një klub nate. Nuk do të them shumën, por kur e pashë mendova: ‘A je çmendur?’ E pagova, por që nga ajo ditë ndryshova. Nuk isha më unë. U ktheva te rrënjët e mia dhe mendova se nuk mund ta përballoja atë jetë. Në atë moment ndërpreva atë mënyrë jetese dhe aty mbaroi gjithçka.”
Disa muaj më vonë, Martin takoi Marian, partneren e tij aktuale, e cila, sipas tij, e ndihmoi të ruajë ekuilibrin dhe të qëndrojë me këmbë në tokë. “Por është shumë e lehtë të humbësh rrugën,” pranoi kampioni i MotoGP, i cili tani është gati për një aventurë të re me Aprilia pas përfundimit të suksesshëm me Ducati, që e ngjiti në majat e botës së motociklizmit.
