Një studim nga Harvard Business School u bë shkas për pronësinë amerikane të Milanit që t’i përgjigjet atyre që, duke shfrytëzuar pakënaqësinë, i bëjnë thirrje të shesin dhe të largohen nga klubi. Kreu i RedBird, Gerry Cardinale, përdori tone të forta, shembuj të fuqishëm dhe ngriti pyetje që tashmë kanë përgjigje, duke e bërë të qartë qëndrimin e tij lidhur me zhurmën e fundit rreth klubit. Këngët dhe fishkëllimat shoqëruan San Siron në 125-vjetorin e kuqezinjve. Në Verona, edhe pas fitores, atmosfera ishte e njëjtë. Një situatë e pamëshirshme, por shumë reale, sepse skuadra vazhdonte të lëngonte në fushë dhe zhgënjimi ishte i thellë, për shkak të rezultateve të dobëta këtë sezon dhe raportimeve për tensione brenda dhomës së zhveshjes.
Shigjetimi për Inter
Drejtori ekzekutiv Furlani përmendi kërcënimet me vdekje që kishte marrë pas shitjes së Sandro Tonalit. Nga ana tjetër, Cardinale përdori frazën “të fitosh me inteligjencë” si një manifest të filozofisë së tij. Ai bëri një krahasim me kampionët e Italisë në fuqi, Inter, për të sqaruar se si e sheh ai të ardhmen e Milanit dhe cilat janë strategjitë e tij për të arritur objektivat.
Nuk është se atij i pëlqen ideja që të jetë tashmë, në dhjetor, pothuajse jashtë garës për titull dhe të kënaqet me një paraqitje në Champions League të alternuar mes ndeshjeve të shkëlqyera, si ajo kundër Real Madridit, dhe momenteve të rrezikshme, si ato kundër Slovan Bratislavës.
Lexo më tej: Fitorja në Verona nuk qetëson tifozët e Milan: kore kundër presidentit Cardinale
“Fitorja e kampionatit është padyshim një objektiv i rëndësishëm,” pranoi Cardinale, por toni i tij nënkuptonte se kishte një mesazh më të thellë. “Por duhet ta balancojmë këtë ambicie me mundësinë për të fituar me inteligjencë.” Çfarë do të thotë kjo? Ai e shpjegoi me një shembull të fortë: “Interi fitoi kampionatin vitin e kaluar dhe më pas falimentoi (duke iu referuar faktit që pronari Zhang u detyrua ta shesë te fondi Oaktree). A është kjo ajo që duam ne? Për tifozët, puna ime është të fitoj kampionatin çdo vit, e kuptoj. Por për investitorët e mi, puna ime është të siguroj që Milan të konkurrojë për kampionatin çdo vit, të jetë në Champions League çdo vit dhe të shkojë gjithnjë më tej në Kupë.”
Vizioni i Jerry Cardinale
Ky është një vizion ndryshe, sepse mentaliteti i sipërmarrjes fokusohet në një menaxhim që “maksimizon fluksin e parasë dhe vlerën e markës,” duke menduar për të ardhmen pa stresin e të tashmes dhe duke besuar se rezultatet e sotme nuk vlejnë nëse nuk mbështeten mbi baza të qëndrueshme.
