Mykhailo Mudryk rrezikon një pezullim të rëndë pasi ka rezultuar pozitiv në një kontroll antidoping të kryer në tetor të kaluar. Në analizat e tij janë zbuluar nivele të pazakonta të substancës së ndaluar Meldonium, e njëjta që çoi në një pezullim dyvjeçar për tenisten Maria Sharapova në vitin 2016. Futbollisti ukrainas vazhdon të deklarojë pafajësinë e tij dhe aktualisht është pezulluar vetëm përkohësisht. Për t’u mbrojtur, ai ka zgjedhur të bashkëpunojë me të njëjtin studio ligjor që ka mbrojtur Paul Pogba në rastin e dopingut të tij.
Sipas Telegraph, Mudryk dhe klubi i tij, Chelsea, kanë ndërmarrë menjëherë hapa për ta mbrojtur atë nga një pezullim i mundshëm katërvjeçar, i cili mund të dëmtojë rëndë karrierën e tij. Për këtë arsye, ai ka angazhuar Morgan Sports Law për të punuar në rastin e tij, duke shpresuar të provojë pafajësinë që ka shpallur përmes një deklarate zyrtare.
Mudryk ndjek shembullin e Pogba, punëson avokatët e tij
Shpresa e tij është të shmangë një dënim të ngjashëm me atë të Pogba-s. Aktualisht, Mudryk është pezulluar nga FA dhe nuk lejohet të luajë asnjë ndeshje gjatë periudhës së hetimeve. Gjithashtu, atij i është ndaluar të marrë pjesë në stërvitjet me shokët e tij te Chelsea, duke u detyruar të mbajë formën me seanca të veçanta stërvitore. Angazhimi i Morgan Sports Law është pjesë e përpjekjeve për të mbrojtur të ardhmen e tij, pasi i njëjti studio ka arritur të ulë pezullimin e Pogba-s nga katër vite në 18 muaj.
Lexo më tej: "E mori pa dashje dhe nuk rrit performancën". CAS ul skualifikimin e Pogba: në fushë me Juventus në mars
Dënimi maksimal për Mudryk mund të jetë katër vite, por vendimi përfundimtar varet nga rezultatet e analizës së kampionit B, që ende nuk është shqyrtuar. Deri tani, pozitiviteti është zbuluar vetëm në kampionin A të marrë në tetor, çka ka mjaftuar për pezullimin e përkohshëm, ndërsa pritet rezultati përfundimtar dhe çdo apel i mundshëm.
