Pas njoftimit të turneut të ri të Super League, e paraqitur me emrin Unify League, po vijnë më shumë detaje rreth garës evropiane të propozuar nga A22. Janë katër turne që parashikohen nga modeli i ri, nga më elitari deri te më “popullori”. Do të jenë gjithsej 96 ekipe pjesëmarrëse, të shpërndara në katër kompeticione:
• Star League: 16 ekipe pjesëmarrëse (dy grupe nga tetë ekipe)
• Gold League: 16 ekipe pjesëmarrëse (dy grupe nga tetë ekipe)
• Blue League: 32 ekipe pjesëmarrëse (katër grupe nga tetë ekipe)
• Union League: 32 ekipe pjesëmarrëse (katër grupe nga tetë ekipe)
Për sa i përket mënyrave të kualifikimit, klubet nga të gjitha 55 federatat kombëtare UEFA, ku bën pjesë edhe Shqipëria, mund të kualifikohen në Unify League përmes një prej këtyre mundësive:
• Fitorja e një turneu të Unify League në sezonin e mëparshëm
• Kualifikimi direkt nga kampionati vendas
• Kualifikimi përmes procesit të playoff-it përkatës
Kampionët e ligave Star dhe Gold do të sigurojnë automatikisht një vend në Star League të sezonit pasardhës, ndërsa kampionët e ligave Blue dhe Union do të sigurojnë një vend në Gold League dhe një në Blue League të sezonit pasardhës.
Të gjithë klubet pjesëmarrëse nga kampionatet kryesore kombëtare të 55 federatave kombëtare UEFA në fillim të sezonit mund të sigurojnë hyrje direkte në katër ligat ose në playoff-et e kualifikimit, bazuar në rezultatet që kanë arritur në kampionatet e tyre kombëtare në sezonin e kaluar. Vendet e kualifikimit direkt dhe aksesit në playoff për secilën garë do të caktohen bazuar në një koeficient të përgjithshëm të kompeticionit evropian, i njohur si “renditja për shtet”: një klasifikim transparent dhe objektiv, i bazuar në performancën e klubeve të secilës federatë në kompeticionet evropiane.
