Në një shkollë fillore në Hampshire në Angli, gjatë një ore të mësimit të fesë, një prift anglikan i quajtur Paul Chamberlain u tha nxënësve se Babagjyshi nuk ekziston. Për të qenë më të saktë, Chamberlain ia tha këtë një klase fëmijësh 10-11 vjeç.
Madje ai u kishte thënë se biskotat që kishin lënë në shtëpi për burrin me mjekër të bardhë dhe kostum të kuq mbrëmjen e 25 dhjetorit nuk hëngri ai, por nëna dhe babai i tyre.
Me të marrë këtë informacion, fëmijët kanë shpërthyer në lot. Pas ankesave të bëra nga prindërit, prifti kërkoi falje. Ngjarjen e raportoi BBC duke cituar “The Times”.
"Nuk e di si mund të rregullohet, por është e neveritshme kjo që ndodhi. Nuk dua ta shoh më priftin pranë vajzës sime. Shpresoj që ai person të mos shkojë më në shkollë", - u shpreh prindi i njërit prej fëmijëve të përfshirë.
Një zëdhënës i dioqezës përkatëse anglikane, të Portsmouth, tha se prifti Chamberlain kishte pranuar se kishte bërë një "gabim që nuk duhej ta kishte bërë. Ai i kërkoi falje shkollës, prindërve dhe fëmijëve" – u tha në deklaratë. ©LAPSI.al
