Andrés Iniesta ka mbyllur karrierën e tij si futbollist me një ndeshje eksibicioni mes legjendave të Barcelonës dhe Real Madridit në Tokio dhe tani do të nisë studimet për t’u bërë trajner. Legjenda e futbollit spanjoll, 40 vjeç, kishte njoftuar në tetor se do të varte këpucët në gozhdë pas një karriere të jashtëzakonshme, gjatë së cilës fitoi dy Kampionate Europiane dhe Kupën e Botës në 2010.
Para 45 mijë tifozëve që ishin mbledhur për t’i dhënë lamtumirën, Iniesta dha një shfaqje të fundit të aftësive që e bënë një nga më të mirët në histori, duke fituar gjithashtu 9 tituj të La Liga-s dhe 4 Champions League gjatë 16 viteve të tij me Barcelonën. Ai siguroi që të largohej mes duartrokitjeve, me një krosim në minutën e fundit që mbrojtja e Real Madridit e devijoi në portën e vet, duke i dhënë Barcelonës fitoren 2-1.
Lexo më tej: Iniesta, lamtumirë mes lotëve nga Vissel Kobe: tre janë skenarët për kampionin spanjoll
“Mendoj se ishte një ndeshje e shkëlqyer për tifozët japonezë,” tha Iniesta, i cili luajti në Japoni për pesë vite pasi u largua nga Barcelona në 2018. “Nëse ata janë kthyer në shtëpi të kënaqur, atëherë unë jam shumë i lumtur.” Gjatë karrierës së tij në Camp Nou, Iniesta grumbulloi 674 paraqitje dhe fitoi gjithsej 32 trofe. Më pas, ai u transferua te Vissel Kobe në Japoni, përpara se të kalonte sezonin e tij të fundit në Emiratet e Bashkuara Arabe.
Për planet e ardhshme, Iniesta tha: “Jam duke menduar të marr licencën për trajner dhe dua të shoh se ku do të më çojë karriera ime.”
