Reshjet e shiut, të pasdites së sotme, kanë krijuar vështirësi në qarkullim për drejtuesit e mjeteve dhe te kalimtarët në rrugët e Durrësit. Uji ka vërshuar në rrugë duke kapur disa cm lartësi.
Si pasojë e motit të keq me reshje shiu dhe në disa zona malore me reshje dëbore, policia apeloi për kujdes të shtuar për drejtuesit e automjeteve dhe motomjeteve.
“Të gjithë drejtuesit e automjeteve dhe motomjeteve të ndjekin udhëzimet e shërbimeve të Policisë Rrugore. Deri në këto momente nuk ka asnjë aks rrugor të bllokuar. Ndërkohë, në të gjitha drejtoritë janë ngritur grupet e emergjencës dhe po mbajnë kontakte me përfaqësuesit e pushtetit vendor, me firmat kontraktore dhe emergjencat civile.
Në rast nevoje, telefononi në numrin pa pagesë 112 dhe shërbimet e Policisë do t’ju vijnë menjëherë në ndihmë”, thuhet në njoftimin e policisë.
