Mbrëmjen e dielës është rikthyer moti i keq me shiu dhe erë të fortë. Stuhitë kanë vijuar përgjatë natës së djeshme duke shkaktuar probleme me energjinë elektrike në disa zona.
Raportohet se disa fshatra në Skrapar dhe Kuçovë ka patur ndërprerje të energjisë elektrike. Në rrethin e Kuçovës janë dëmtuar 6 kabina elektrike, duke lënë pa energji prej orëve të para të mëngjesit rreth 200 abonentë në zonën Gegë-Frashër.
Ndërkohë, si pasojë e erërave të fortë, OSHEE në Berat njofton se është dëmtuar fidri nr.9 në nënstacionin e Çorovodës, duke lënë pa energji elektrike rreth 40 abonentë. Mësohet se fshatrat e thella malore: Leshenje, Potom, Kostren e Tomorr kanë mbetur pa energji prej disa orësh.
Burimet zyrtare të OSHEE-së Berat, konfirmojnë se ekipet ndodhen në terren dhe po vijojnë punën për të riparuar linjat dhe kabinat e dëmtuara, me qëllim kthimin sa më të shpejtë të energjisë elektrike.
