“Përgëzoj edhe Egnatian për faktin se janë kampionë në fuqi dhe mënyrën se si luajnë. Por këtë kampionat është hera e tretë që ndodh që kemi 23 lojtarë në fushë". Alexandar Veselinovic ka ruajtur pathyeshmërinë, duke mbajtur prapa edhe Egnatian në barazimin 1-1 në Arenën e Demave. Tekniku serb, që është përjashtuar gjatë ndeshjes për protesta, ka akuzuar arbitrin: "Kanë qenë 22 vetë në lartësinë e ndeshjes dhe i 23-ti nuk ka qenë në atë lartësi dhe mund të them me shumë bindje që nuk la të zbatonim asgjë që kishim përgatitur. Kjo është hera e tretë që ndodh në këtë sezon".
Veselinovic pastaj pranoi vlerën e kundërshtarit, por duke sulmuar sërisht arbitrin: "Sot kemi luajtur kundër një kundërshtar shumë cilësor. Nuk është se dua të krijoj tension por kam 40 vite në futboll dhe kuptoj kur janë disa gjëra që ndodhin dhe çekuilibrojnë ekipin. Me plot përgjegjësi e them që nuk mund të implementonim idetë tona, se nuk na e mundësuan".
Lexo më tej: Video/ Veselinovic tërbohet me arbitrin, Egnatia ndal Partizanin mes polemikave
Sigurisht ka gjëra që duhen përmirësuar: "Të gjitha komplimentet e mundshme për Egnatian. Patjetër që do analizojmë dhe të shohim çfarë mund të përmirësojmë në fazat e lojës ku nuk ishim në lartësinë e duhur. Nuk dua të jem tendencioz, por mund të numëroj mbi 10 situata që mund të zgjidhnin ndeshjen në favorin tonë", tha Veselinovic.
TETOVA: "MERITONIM MË SHUMË"
“Për si shkoi ndeshja, të them të vërtetën jam i gëzuar në fund se arritëm të barazonim, por mendoj se meritonim më shumë me rastet e krijuara dhe volumin në fushë". Edlir Tetova, trajneri i Egnatias është i lumtur për barazimin e marrë në minutën e fundit të kohës së rregullt. Tekniku pranon se të tijtë gabuan një pjesë loje, por dominuan në të dytën: "Në pjesën e parë nuk funksionoi pothuajse fare manovra, ato kur funksionoi ishim pak para portës, ishte lojë e vakët. Në pjesën e dytë ishim në gjysmëfushën e kundërshtarit, ishim gjithë kohës në manovër me rastet e humbura. Ata kishin vetëm dy tranzicione drejt portës tonë".
