Forcat rebele në Siri kanë marrë kontrollin e disa lagjeve në qytetin e dytë më të madh të vendit, Aleppo. Lajmin e dha Observatori Sirian për të Drejtat e Njeriut (SOHR), një grup monitorimit me bazë në Mbretërinë e Bashkuar. Ky veprim është ofensiva më e madhe kundër qeverisë siriane në vite dhe hera e parë që rebelët që luftojnë forcat e presidentit Bashar al-Assad kanë arritur në Aleppo që kur u detyruan të largoheshin prej andej në vitin 2016.
Një video e postuar në një kanal të lidhur me grupin militant islamik Hayat Tahrir al-Sham (HTS) duket se tregon luftëtarët rebelë në automjete brenda qytetit. BBC ka verifikuar se pamjet i përkasin një periferie perëndimore të qytetit. Ndërkohë forcat qeveritare thonë se kanë rifituar pozicionet në një numër qytetesh në provincat Aleppo dhe Idlib, pas një ofensive të nisur nga HTS dhe fraksionet aleate të mërkurën.
Më shumë se gjysmë milioni njerëz janë vrarë në luftën civile siriane që shpërtheu pasi qeveria e Assad shtypi protestat pro-demokratike në 2011-ën. Një seri grupesh të armatosura u ngritën kundër qeverisë duke përfshirë edhe xhihadistët që përfituan nga trazirat për të pushtuar një pjesë të territorit të vendit.
Qeveria siriane, me ndihmën e Rusisë dhe aleatëve të tjerë rimori më vonë shumicën e zonave që kishte humbur. Idlibi, bastioni i fundit i mbetur i opozitës, kontrollohet kryesisht nga HTS, por fraksione rebele të mbështetura nga Turqia janë gjithashtu të vendosura atje. Qeveria thotë se përforcimet tani kanë arritur në Aleppo dhe po i dëbon rebelët. ©LAPSI.al
