Për të mos u besuar ajo që ndodhi me ish-sulmuesin e Arsenali dhe Juventusit, Nicklas Bendtner, i përfshirë në një ngjarje të frikshme me thikë në rrugët e Nju Jorkut. Danezi ishte me një grup miqsh kur një burrë i armatosur me thikë i sulmoi. Kamerat e sigurisë e regjistruan tërë ngjarjen. Lajmin e ka publikuar gazeta The Sun.
Ngjarja e pabesueshme që përfshiu Bendtner në NY
Nicklas Bendtner shpëtoi për një fije nga pasojat e rënda pasi u përfshi në një situatë të pabesueshme. Ish-sulmuesi danez javën e kaluar ishte në vizitë në Nju Jork me disa miq, kur një prej tyre u sulmua papritur me thikë. Pamjet e kamerave të sigurisë të qytetit tregojnë ish-lojtarin që po ecte me miqtë në zonën e shtrenjtë të Upper West Side të Manhatanit të mërkurën e kaluar, kur një burrë filloi të vrapojë drejt grupit dhe më pas u largua nga skena.
Një anëtar i grupit, 55 vjeç, ka pësuar lëndime në fytyrë dhe veshë dhe është trajtuar në Spitalin Mount Sinai të Nju Jorkut. Kamerat e sigurisë kanë mundësuar identifikimin e agresorit, Joshua Zinberg, 25 vjeç, i cili është arrestuar ditën pas ngjarjes dhe është akuzuar për tentativë vrasjeje dhe sulm. Agresori, i cili është denoncuar nga nëna e tij, e cila e ka njohur në pamjet e filmimit, ka një dosje të mëparshme dhe probleme të shëndetit mendor.
Bendtner ka dhënë një koment të shkurtër për ngjarjen në Ekstra Bladet: "Mund të konfirmoj që jam unë në video," ka thënë ai.
