Emisari i Bashkimit Europian për dialogun Kosovë-Serbi, Miroslav Lajçak ka njoftuar se takimi i ardhshëm mes kryenegociatorit të Kosovës Besnik Bislimi dhe atij të Serbisë Petar Petkoviç, do të mbahet në muajin dhjetor.
Lajcak në një postim në rrjetin social Facebook ka shkruar se dy javët e fundit kanë qenë produktive dhe me vizita. Ai ka theksuar se është angazhuar në diskutime të rëndësishme mbi dialogun.
“U angazhova në diskutime të rëndësishme mbi dialogun dhe rrugën përpara. Këto biseda janë kritike në formësimin e punës që po bën ekipi im ndërsa përgatitemi për takimin e ardhshëm të kryenegociatorëve në dhjetor. Pres me padurim periudhën e ardhshme”, ka shkruar ai.
Takimi i fundit në nivel të kryenegociatorëve është mbajtur më 24 tetor. Pas takimit, Bislimi tha se nuk ka rezultate për të ecur përpara në normalizimin e marrëdhënieve me Serbinë. Ai e quajti raund të dështuar takimin me Petkoviq të Serbisë, nën ndërmjetësimin e emisarit për dialog të Bashkimit Europian, Miroslav Lajçak.
Ndërkaq, Petkoviç tha se bisedimet kanë qenë të vështira dhe se delegacioni i tij ka insistuar në themelimin e Asociacionit të komunave me shumicë serbe.
