Vajza iraniane që u zhvesh me të brendshme si protestë kundër hixhabit në një universitet në Teheran duket se nuk do të ketë pasoja ligjore. Të paktën këtë thonë autoritetet iraniane. Videoja e saj u bë virale në mediat sociale. E identifikuar si Ahoo Daryaei ajo u zhvesh në një kampus universitar përpara se të arrestohej me forcë.
Një zëdhënës i gjykatave iraniane tha se gruaja ishte trajtuar në spital dhe ishte kthyer te familja e saj. Burgimi i saj tërhoqi vëmendje ndërkombëtare. Amnesty International kërkoi lirimin e saj të menjëhershëm dhe pa kushte.
“Duke pasur parasysh se ajo u dërgua në spital dhe u konstatua se ishte e sëmurë, ajo iu dorëzua familjes së saj... dhe kundër saj nuk është ngritur asnjë proces gjyqësor”, - tha zëdhënësi i gjyqësorit Asghar Jahangir.
Një organizatë e lëvizjes studentore publikoi fillimisht videon e arrestimit, duke raportuar se Daryaei pati një përplasje me agjentët e sigurimit për mos-mbajtjen e shamisë, gjë që çoi në zhveshjen e saj gjatë incidentit. Autoritetet iraniane në atë kohë thanë se Daryaei ishte "e sëmurë" dhe ishte dërguar në një repart psikiatrik.
Nuk është hera e parë që autoritetet iraniane e cilësojnë një grua që proteston ndaj ligjeve të detyrueshme të hixhabit me një sëmundje mendore. Pas arrestimit të Daryaei, aktivistët iranianë në Teheran e dënuan atë që ata thanë se ishte një model i diagnostikimit të aktivisteve të së drejtës së grave.
Një grua, e cila u largua nga Irani për në Kanada në vitin 2018, tha se familja e saj ishte nën presion nga regjimi iranian për ta deklaruar atë të sëmurë mendore.
LEXO EDHE: E vërteta e historisë së studentes iraniane që u zhvesh në Teheran
“Familja ime nuk e bëri këtë, por shumë familje nën presion e bëjnë, duke menduar se kjo është mënyra më e mirë për të mbrojtur të dashurit e tyre. Kjo është mënyra se si Republika Islamike përpiqet të diskreditojë gratë, duke vënë në pikëpyetje shëndetin e tyre mendor”, - tha Azam Jangravi, e cila u arratis pasi u dënua me 3 vjet burg për heqjen e shamisë gjatë një proteste.
Pas Revolucionit Islamik të vitit 1979 u bë e detyrueshme për gratë në Iran që të mbulonin flokët dhe të visheshin në mënyrë modeste. Dy vjet më parë, gruaja kurde Mahsa Amini vdiq në paraburgim nga policia pasi u ndalua për mungesë të hixhabit “si duhet”. Më shumë se 500 njerëz thuhet se u vranë gjatë muajve të protestave mbarëkombëtare që shpërthyen pas vdekjes së saj. ©LAPSI.al
