Presidenti i Italisë, Sergio Mattarella i është përgjigjur miliarderit amerikan, Elton Musk i cili një ditë më parë me anë të një postimi në rrjetin social “X” tha se gjyqtarët e Gjykatës së Romës duhet të largohen.
Ky reagim i Musk erdhi pasi Gjykata e Romës pezulloi marrëveshjen dypalëshe mes Shqipërisë dhe Italisë për emigrantët që pritet të strehohen në Kampin e Gjadrit, duke u pozicionuar në krah të Melonit.
Mattarella tha se Italia është një shtet demokratik i cili di të mbrohet vetë dhe është i pavarur në vendimarrje.
“Italia është një vend i madh demokratik dhe duhet të ritheksoj, me fjalët e përdorura në një rast tjetër, më 7 tetor 2022, se “ajo di të kujdeset për veten në përputhje me Kushtetutën e saj”.
Çdokush, veçanërisht nëse, siç është paralajmëruar, do të marrë një rol të rëndësishëm qeveritar në një vend mik dhe aleat, duhet të respektojë sovranitetin e saj dhe nuk mund të marrë përsipër detyrën për t'i dhënë Italisë receta", tha Sergio Mattarella.
Nuk kaloi shumë kohë kur manjati amerikan i teknologjisë reagoi sërish lidhur me faktin që aktualisht marrëveshja mes Romës dhe Tiranës është e ngrirë.
"Kjo është e papranueshme. A jeton populli italian në një demokraci apo është një autokraci e pazgjedhur ajo që merr vendime?",-shkruan Musk në rrjetin social “X”.
Kundërpërgjigjen e Matarellës për Musk, mediat italiane thonë se e mbështeti dhe vetë kryeministrja Georgia Meloni.
“Ne gjithmonë dëgjojmë me shumë respekt fjalët e Presidentit të Republikës”. Kështu ka deklaruar kryeministrja Meloni pas deklaratës së Matarellës, raportojnë burime në Palazzo Chigi.
