Kombëtarja shqiptare nisi sot zyrtarisht përgatitjet për dy ndeshjet e fundit të UEFA Nations League ndaj Çekisë dhe Ukrainës, por lajmet për teknikun Sylvinho nuk kanë qenë të mira. Lista e brazilianit është tkurrur me shpejtësi nga 28 në 24 lojtarë, me katër futbollistë që nuk mund të jenë të gatshëm për dy ndeshjet vendimtare. Berat Gjimshiti, Keidi Bare, Rei Manaj dhe Marash Kumbulla e kanë të pamundur të luajnë për shkak dëmtimi.
FIRON LISTA, KATËR TË DËMTUAR
Gjimshiti u dëmtua në ndeshjen e fundit në kampionat ndaj Udinese, ndërsa Bare dhe Kumbulla ishin të dëmtuar dhe pas komunikimit të stafit mjekësor të Kombëtares me klubet përkatëse është vendosur që futbollistët të vazhdojnë rikuperimin. Gjimshiti, doli nga fusha para kohe kundër Udinese dhe iu nënshtrua ekzaminimeve strumentale që evidentuan një shembje në kaviljen e djathtë. Përjashtohen frakturat, por kapiteni kuqezi nuk do të mund të jetë në fushë kundër Çekisë e madje as Ukrainës.
Lexo më tej: Video/ "Në Çeki ndeshja jonë më e keqe në dy vjet": Strakosha gati për hakmarrje
Sakaq, Rey Manaj ka mbërritur sot në grumbullim dhe i është nënshtruar menjëherë testeve mjekësore. Pas shqyrtimit nga ana e stafi mjekësor u konkludua se sulmuesi nuk mund të rikuperohet në kohë dhe u vendos që Manaj të rikthehet në klubin e tij për të vijuar me programin e rekuperimit. Për shkak të këtyre katër mungesave trajneri Sylvinho ka vendosur të grumbullojë për dy ndeshjet e nëntorit Adrian Bajramin, Jon Mersinajn dhe Arbnor Mujën. Lojtarët pritet të bashkohen me kuqezinjtë gjatë të martës për të nisur stërvitjen.
STËRVITJA NË ARENA KOMBËTARE
Në seancën e zhvilluar sot në stadiumin “Air Albania” morën pjesë Ylber Ramadani, Myrto Uzuni, Ivan Balliu, Kristjan Asllani, Ardian Ismajli, Arbër Hoxha, Mario Mitaj, Alen Sherri, Simon Simoni, Elseid Hysaj, Andi Hadroj, Thomas Strakosha dhe Feta Fetai. Me grupin kuqezi u bashkuan dhe një pjesë të mirë të lojtarëve të Kombëtares U-21, që janë grumbulluar në kuadër të dy ndeshjeve miqësore me Moldavinë që luhen në Shqipëri në datat 15 dhe 18 nëntor. Disa prej lojtarëve kanë mbërritur në Tiranë, ndërsa grupit pritet të jetë i plotë ditën e martë.
