“Palestina e lirë”. Plas skandali nga banderola e tifozëve: PSG rrezikon sanksione

Ndeshja mes PSG dhe Atletico Madrid ishte një nga më të priturat e ditës së katërt të Champions League. Spanjollët fituan me një gol në minutën e fundit, dhe Donnarumma u përball me kritika të ashpra. Por, një tjetër “ndeshje” ndodhi paralelisht në tribunë, duke shkaktuar polemika edhe pas përfundimit të ndeshjes. Tifozët e PSG-së shfaqën një banderolë me mbishkrimin “Palestina e lirë”, që u kundërshtua fuqimisht nga ministri i Brendshëm francez, Bruno Retailleau, i cili kërkoi shpjegime dhe kërcënoi me sanksione të ashpra.

Banderola “Palestina e lirë” përpara PSG-Atletico Madrid

Para ndeshjes, në tribinën e PSG-së, tifozët shfaqën një banderolë gjigante ku shkruhej: “Palestina e lirë” dhe më poshtë, “Lufta në terren, por paqja në botë”. Banderola përmbante një imazh të Kupolës së Shkëmbit, monumentit më të vjetër mysliman në Palestinë, dhe në anën e djathtë, një fëmijë me flamurin e Libanit.

Përgjigja e ashpër e Ministrit të Brendshëm të Francës

Kjo banderolë mori vëmendje globale dhe nxiti një reagim të fortë nga ministri i Brendshëm francez, Bruno Retailleau, i cili e dënoi aktin duke e quajtur “të papranueshëm” dhe kërkoi shpjegime nga klubi. Duke folur për Sud Radio, ai shtoi: “Nëse kjo ndodh përsëri, do të shqyrtojmë ndalimin e tifozëve të klubeve që nuk respektojnë rregullat”. Ministri vazhdoi, duke thënë se UEFA ndalon mesazhet politike në ndeshjet e saj, dhe nëse PSG nuk e parandalon këtë, do të përballet me ndalime dhe sanksione të tjera.

🔴 ALERTE INFO Tifo XXL en soutien à la Palestine au Parc des Princes : "S'il faut y aura des sanctions, je ne m'interdis rien. Je demande des explications au @PSG_inside. C'est inacceptable" déclare @BrunoRetailleau pic.twitter.com/5Y4ts9jlth

— Sud Radio (@SudRadio) November 7, 2024

Çfarë rrezikon PSG për banderolën “Palestina e lirë”

Paris Saint-Germain publikoi një deklaratë për të komentuar situatën: “PSG kujton se Parc des Princes është dhe duhet të mbetet një vend për pasionin e përbashkët për futbollin dhe kundërshton çdo mesazh me natyrë politike në stadiumin e tij”. Ky reagim mund të ndihmojë në zbutjen e sanksioneve, pasi UEFA ndalon mesazhet politike dhe PSG rrezikon një sanksion në përputhje me nenin 16 të rregullores disiplinore, ku parashikohet përgjegjësi për sjellje të papërshtatshme të tifozëve dhe ndalimin e mesazheve provokuese politike, ideologjike, fetare ose fyese gjatë ngjarjeve sportive.