Gjykata e Elbasanit ka nxjerrë nga qelia të gjithë pedagogët e Universitetit të Elbasanit, që tre ditë më parë u arrestuan me bujë nga policia, pasi akuzohen se kanë marrë para në këmbim të dhënies së provimeve.
Ndërkaq është vendosur që kjo dosje t'i kalojë SPAK-ut, për shkak të elementëve të saj, bashkëpunimit mes disa personave dhe akuzës së ngritur.
Seanca e masës së sigurisë ka zgjatur disa orë, për shkak edhe të numrit të konsiderueshëm të personave të ndaluar, 7 ndërsa një i tetë është në kërkim.
Gjyqtarja Yrfet Shkreli e ka cilësuar arrestimin si të paligjshëm nga ana e policisë. Në fund është vendosur që të gjithë pedagogët e ndaluar të lënë qelinë dhe të marrin masën e sigurisë ‘detyrim paraqitje’.
Në burg është lënë vetëm sekseri mes studentëve dhe pedagogëve.
Pedagogët që lanë qelitë janë Ornela Bilali, Zyhra Gripshi, Adrian Shingjergji, Beatriçe Gani, Florinda Tarusha dhe Monika Hodaj.
Në kërkim është pedagogia Edlira Gugu.
Ndërkaq seksesi që mbeti në qeli është Gazmend Hodaj, 59 vjeç, i cili kishte një lokal tek universiteti i Elbasanit dhe kryente ndërmjetësinë.
Mediat kanë publikuar edhe një fotografi nga përgjimet që ka administruar Prokuroria e Elbasanit, ku studentja korrupton pedagogen me thes me patate.
“Zysha të kam sjell diçka, ku mund të ta lë… Ke ikur apo je në shkollë”, shkruhet ndër të tjera në mesazhe.
Ajo e pyet pedagogen nëse është në shkollë apo është larguar, pasi i ka sjell në universitet një thes me patate, ndërkohë që zysha i thotë se është larguar.
