Është arrestuar në Prishtinë, Gëzim Gashi, një person i shumëkërkuar nga autoritetet e Kosovës pasi ndaj tij rëndonin akuza për 67 vepra penale dhe për të ishin lëshuar 5 fletë-arreste. Për 22 prej akuzave, 39-vjeçari është dënuar tashmë.
Ato kanë të bëjnë me mbajtje të armëve, furnizim, transport, prodhim, këmbimi ose shitja e paautorizuar të tyre, vjedhje në pyll, sulm ndaj personit zyrtar, falsifikimi i dokumenteve, mashtrim, vjedhje rëndë, kanosje e mospërfillje të gjykatës.
Ai dyshohet se edhe e kërcënoi prokurorin Ersan Qavolli që po e heton rastin e tij. Bashkë me të u arrestua edhe vëllai i Gëzimit, Faik Gashi për shkak se ka falsifikuar disa dokumente.
Ata janë arrestuar në një aksion të madh të Njësisë Speciale më 30 tetor në lagjen “Arbëria” të Prishtinës, por lajmi u bë i ditur këtë 1 nëntor. Ndaj tij kishte pasur shpesh aksione të policisë, por askush nuk e mendonte se fshihej në zemër të Prishtinës. ©LAPSI.al
