Atentati i ndodhur në Shkodër pak ditë më parë i mori jetën dy personave, Hamza Lici dhe Arlind Bushati, ndërsa humbi jetën edhe Flutura Basha, e cili ndodhej rastësisht aty, duke qenë se po udhëtonte me bashkëshortin me motor.
Motra e viktimës, Flutura Bashës, foli sot ekskluzivisht në emisionin “me Zemër të Hapur” të moderatores Evis Ahmeti, në News24, ku deklaroi se ishte fati i saj i keq pasi ndodhej në vendin dhe në kohën e gabuar. Ajo rrëfeu edhe momentin se si e kishte marrë vesh lajmin, teksa më tej zbuloi për gjendjen e bashkëshortit të Fluturës, Bashkim Basha, i cili ndodhet në reanimacion në gjendje kritike.
“Fati i saj i keq. Ishte ne vendin e gabuar në kohën e gabuar. Bashkimi është shumë keq. Akoma nuk ka dalë nga gjendja e rrezikut. Më vjen keq për nënat e viktimave thash kur mora vesh për viktimat. Pastaj thanë se ishte edhe një çift, po i thoja tim shoqi mos o zot sikur ta kishim në fis. Flutura la pas dy vajza dhe një djalë. Bashkimi merrte 100 mijë lekë pension. Kishte 3-4 muaj që kishte nisur punë sanitare. Ishte e kënaqur me punën. Vendngjarja nga shtëpia e Fluturës në vijë ajrore nuk janë as një kilometër larg. Nuk e dimë nëse po ktheheshin në shtëpi apo po shkonin për në punë. Bashkimi është ende në reanimacion, stafi i spitalit po i rri tek koka. Është në intubim, ka dëmtime gjithkund, vetëm një mrekulli mund ta shpëtojë”, tha ajo.
