Qeveria italiane është kritikuar për lavdërimin e ushtarëve fashistë që luftuan në El Alamein, në 82-vjetorin e betejës së Luftës së Dytë Botërore. Në një postim në rrjetet sociale, thuhet se ata që morën pjesë "sakrifikuan jetën për lirinë tonë", duke e përshkruar humbjen italiane dhe naziste ndaj aleatëve në Afrikën e Veriut si "heroike dhe tragjike".
Partitë e opozitës së majtë i dënuan komentet. Partia “Lëvizja Pesë Yjet” tha se ishte "e pavend" të thuhej se trupat italiane kishin luftuar për liri. Akuzat vijnë pavarësisht se kryeministrja Giorgia Melonipo bën përpjekje të vazhdueshme për të distancuar partinë e saj të krahut të djathtë në pushtet, “Vëllezërit e Italisë” (Fdl), nga e kaluara totalitare e Italisë.
Fdl është një pasardhëse e drejtpërdrejtë politike e Lëvizjes Sociale Italiane, e cila u formua nga anëtarët e Partisë Fashiste të Benito Musolinit pas luftës. Meloni ka kërkuar të distancojë mishërimin modern të partisë nga origjina e saj, duke thënë se ajo nuk toleron racizmin, antisemitizmin apo nostalgjinë për kohën e Italisë nën Musolinin.
Nën sundimin fashist, Italia u bashkua me Gjermaninë naziste gjatë Luftës së Dytë Botërore dhe luftoi së bashku me trupat e saj gjatë fushatës në Afrikën e Veriut. Beteja e dytë e El Alamein - e cila filloi më 23 tetor 1942 - konsiderohet fitorja e parë e madhe për forcat aleate në Luftën e Dytë Botërore dhe një pikë kthese kryesore në konfliktin e përgjithshëm. Mijëra ushtarë italianë u vranë ose u kapën, me disfatën që i mohoi fuqive të Boshtit dominimin ushtarak mbi Afrikën e Veriut.
Paola Chiesa, një politikane e Fdl, tha se "zemra e kombit" ishte në El Alamein në përvjetorin e fillimit të betejës. “Lëvizja Pesë Yjet” kundërshtoi pretendimin e qeverisë se ushtarët italianë kishin luftuar për liri, duke argumentuar se ata ishin "viktima të regjimit kolonial dhe fashist" të asaj kohe.
Partia e Melonit është përballur edhe më parë me kritika për dështimin e saj për të dënuar festimet e së kaluarës fashiste të Italisë. Në janar, Meloni heshti pasi qindra burra u panë duke përshëndetur në mënyrë fashiste në një tubim në Romë. Elly Schlein, kreu i Partisë Demokratike (PD) të qendrës së majtë tha në atë kohë se kushtetuta e bënte të qartë se "grupet neofashiste duhet të shpërbëhen".
Meloni thotë se Fdl nuk duhet të quhet "ekstrem i djathtë". Në prill ajo vendosi një kurorë në Ditën e Çlirimit Kombëtar të Italisë, e cila feston pavarësinë e saj nga Gjermania naziste dhe fundin e fashizmit. Në korrik, ajo tha se ishte "e zemëruar dhe e trishtuar" nga raportet e anëtarëve të krahut rinor të partisë së saj që kishin duke bërë përshëndetje fashiste, si dhe duke përdorur gjuhë raciste dhe antisemitike. Por kritikët vërejnë se partia ende mban të njëjtën logo me tre ngjyra të flakës së përdorur nga neofashistët pas luftës. ©LAPSI.al
