Ngjarja që lidhet me pretendimin për përdhunim të një gruaje nga ylli i Real Madrid dhe i kombëtares së Francës, Kylian Mbappé, çdo ditë pasurohet me detaje të reja. Pas akuzës për përdhunim dhe ngacmim të paraqitur të shtunën në Stokholm, Mbappé u mbrojt menjëherë në rrjetet sociale, duke i quajtur lajmet e publikuara në gazetat skandinave si “lajme të rreme!!”.
Megjithatë, tani sulmuesi i Real Madrid ka pranuar se ka pasur një marrëdhënie konsensuale në hotelin e kryeqytetit suedez ku po qëndronte, por padia duket se vjen nga një grua tjetër.
Gazeta “Le Parisien” ka tentuar të rindërtojë ngjarjen, duke konfirmuar praninë e Mbappé në Stokholm, me ftesë të ish-shokut të tij të skuadrës, Mukiele, për të shfrytëzuar pushimin nga kombëtaret dhe për t’u larguar për disa ditë nga rutina e zakonshme e stërvitjeve dhe ndeshjeve. Në hotel, Mbappé ka shfrytëzuar shërbimet e një konsiergu të specializuar në organizimin e festave luksoze private, duke pasur më pas një marrëdhënie “konsensuale” me një grua, e cila është konfirmuar nga një shkëmbim mesazhesh pas takimit.
Lexo më tej: Mbappé, prokuroria konfirmon hetimin për përd*unim, konfiskohen veshje
Megjithatë, padia për përdhunim dhe ngacmim është paraqitur në Prokurorinë e Stokholmit nga një vajzë tjetër. Katër ditë pas paraqitjes së padisë, as Mbappé dhe as avokatët e tij nuk janë informuar ende për këtë çështje.
