Vincenzo Coviello, nën hetim në Bari, dyshohet se ka hyrë në llogaritë e disa kampionëve të botës të vitit 1982. Hetimi për dosjet, i cili prej ditësh është në qendër të vëmendjes politike, përfshin në një pjesë të vogël edhe botën e futbollit. Kjo sepse në shënjestër të ish-punonjësit të Intesa Sanpaolo, i cili dyshohet se ka kryer mbi 6 mijë hyrje të paligjshme në llogaritë bankare (nga shkurti 2022 deri në prill 2024), ishin jo vetëm figura politike (përfshirë Kryeministren Giorgia Meloni dhe disa ministra), por edhe protagonistë të futbollit.
Ndër ta, shkruan Corriere della Sera, janë Andrea Agnelli, ish-presidenti i Juventusit, Francesco Totti dhe Diego Armando Maradona. Kërkimet mbi llogaritë e ish-kampionit të ndjerë argjentinas datojnë në mars 2023, rreth dy vjet e gjysmë pas vdekjes së tij. Ndër ish-lojtarët e tjerë të spiunuar ishin edhe figura të njohura si Fulvio Collovati, Marco Tardelli dhe Aldo Serena. Llogaritë e këtyre të fundit, në veçanti, janë kontrolluar me rastin e ditëlindjeve të tyre.
Vincenzo Coviello, ky është emri i punonjësit 52-vjeçar nga Bitonto, tani nën hetim nga Prokuroria e Barit (me qëllim të kuptohet nëse ka vepruar vetë ose në emër të dikujt tjetër), gjithashtu ka kërkuar informacione mbi llogaritë e Juventusit.
