Frika më e madhe e tekniku Sylvinho ka marrë formë. Pasi humbi dy ndeshjet e shtatorit kundër Ukrainës në transfertë dhe Gjeorgjisë në Tiranë, tani Berat Gjimshiti nuk do të jetë as në sfidën e dyfishtë në transfertë kundër Çekisë e Gjeorgjisë. Departamenti i Komunikimit në FSHF bën me dije se kapiteni Gjimshiti nuk do të jetë i gatshëm për Kombëtaren për shkak dëmtimi.
Mbrojtësi kuqezi pësoi një dëmtim në ndeshjen e Champions League, Shakhtar Donetsk – Atalanta dhe pas përfundimit të pjesës së parë nuk zbriti më në fushë. Gjimshiti nuk ishte i grumbulluar me Atalantën edhe në ndeshjen e fundjavës në kampionat ndaj Genoa.
Lexo më tej: Atalanta nuk e grumbulloi, Gjimshiti në dyshim të madh për dy ndeshjet e kombëtares
Stafi mjekësor i Kombëtares shqiptare ka qenë në komunikim të vazhdueshëm me atë të Atalantës dhe është vendosur që Gjimshiti të mos rrezikojë, që të rikuperohet sa më parë dhe të rikthehet sa më shpejt në fushën e lojës.
Lista përfundimtare e Kombëtares është me 23 futbollistë pasi trajneri Silvinjo dhe stafi teknik kanë vendosur që të mos thërrasin tjetër lojtar në mungesë të kapitenit.
