Schillaci, letra prekëse e të birit: "Ishe superheroi që të gjithë fëmijët ëndërronin"

"Përshëndetje baba, mora pak kohë para se të të shkruaj... zbrazëtia që ke lënë është e madhe. Të gjithë të kanë njohur si heroin e netëve magjike, por për fat të keq për ta askush nuk të ka njohur si baba. Ti ke qenë dhe do të jesh përgjithmonë shoku im më i mirë. Ti ishe shembulli më i bukur, superheroi që të gjithë fëmijët ëndërronin kur mbyllnin sytë. Papritmas u largove kështu, si bëje gjithnjë: duke befasuar, pa paralajmërim". Kështu ka shkruar Mattia Schillaci, djali i Totò Schillaci në një postim në Instagram ditën e funeralit të ish-sulmuesit të kombëtares italiane. "Një gur në zemër, në shpirt, një thikë në gjoks, një plagë e madhe, dhe shenjat do të mbeten përgjithmonë. Do të të mbaj gjithmonë në zemrën time, atë zemër që është përgjysmuar tani që je larg meje - vijon letra e hapur -. Asnjë nuk mund ta thyejë lidhjen tonë, të krijuar nga dashuria, sinqeriteti dhe zemërimi: dy shoqërues që udhëtuan së bashku, nga dita që më solle në botë deri në ditën kur më le. Gjaku yt do të rrjedhë gjithmonë në venat e mia dhe prania jote do të jetë konstante, e përsëritur, e fiksuar në jetën time".

Lexo më tej: Totò Schillaci nuk ia del: lamtumirë heroit të papritur të Itali '90

Një rrëfim i sinqertë i përjetimeve të fundit me të atin lëngues: "Ditët e fundit të kaluara së bashku të bënë më të dobët dhe më të brishtë, fizikisht dhe emocionalisht. Ai bastard të kapi dhe të mbyti; ai ndoshta ishte një fans më i madh se shumë të tjerë, aq sa nuk të braktisi deri sa në fund. Çfarë t'i bësh? Më thoshe gjithmonë, ndonjëherë, këta fansa të masakronin, por ky ishte vërtet mbytës. Por ti luftove si luan, zemra jote ishte e çeliktë, ishe i lidhur me jetën. Kështu më tha ajo doktoresha me sy të kaltër, në atë repart, në ditët e fundit. Ti linde duke luftuar e ike në të njëjtën mënyrë. Ndoshta fitoi ai, ndoshta... sepse në realitet nuk është kështu: ne do të jemi gjithnjë bashkë, kudo që të jesh", rrëfeu djali i Toto Schillaci. Të kisha premtuar se do të jem me ty deri në fund, por të gënjeva, sepse mes meje dhe teje, mes lidhjes sonë, në dashurinë tonë, nuk do të ketë fund kurrë. Tani vërtet nuk e di se si do të jetë pa ty, nuk e di nëse koha do ta shërojë këtë plagë, por e di që do të më ndihmosh dhe do të më drejtosh, jam i sigurt për këtë. Të dua pafundësisht dhe trashëgimia jote do të vazhdojë të jetojë në zemrat tona. Faleminderit për atë që ishe, faleminderit për atë që na dhe. Faleminderit për gjithçka, baba. Herët a vonë do të shihemi përsëri. Të dua”.

View this post on Instagram

A post shared by Mattia Schillaci (@mattiaschillaci)