Një shqiptar është vënë në pranga në Itali, pasi rezultoi nën efektin e drogës dhe alkoolit ndërsa po udhëtonte me partneren e tij dhe pësuan aksident. Sipas gazetës Corriere della Sera, 22-vjeçari Ali Hoxha rezultoi pozitiv në analizat për zbulimin e pranisë së alkoolit dhe drogës në gjak.
Partnerja e tij Maria Grazia Bedin humbi jetën pasi makina u kthye përmbys në qytezën Fondi. Makina e drejtuar nga partneri i saj është përmbysur me sa duket nga pakujdesia e 22-vjeçarit. Djali disa muajsh i çiftit gjithashtu u plagos rëndë dhe ndodhet në spitalin Bambino Gesù në Romë .
Drejtuesi i mjetit u vu në pranga. Ngjarja ka ndodhur në zonën e Sant’Anastasia, pas mesnate, kur automjeti Golf i drejtuar nga i riu është përmbysur për shkak të shpejtësisë së madhe.
Në makinë ndodhej edhe partnerja e tij 24-vjeçare, djali i tyre pak muajsh, së bashku me motrën e tij. Makina u përmbys disa herë duke shkaktuar vdekjen e menjëhershme të 24-vjeçares, ndërsa dy të tjerët nuk janë në gjendje kritike, por po marrin kujdes shëndetësor. ©LAPSI.al
