Gati dy muaj pasi Princesha e Uellsit tregoi se ishte diagnostikuar me kancer, një zëdhënës i Pallatit Kensington ndau një përditësim mbi kthimin e mundshëm të Kate në detyrat e saj publike.
"Princesha nuk pritet të kthehet në punë," tha përfaqësuesi në një deklaratë të 21 majit për BBC.
Kate dhe fëmijët e saj Princi George, 10 vjeç, Princesha Charlotte, 9 vjeç dhe Princi Louis, 6 vjeç, të cilët ajo i ndan me Princin William, kanë qëndruar larg vëmendjes që kur ajo doli në publik me diagnozën e saj të kancerit në mars. Në atë kohë, 42-vjeçarja tha se ishte në fazat e hershme të kimioterapisë parandaluese, të cilën e filloi me rekomandimin e mjekëve të saj, kur testet e kryera pas operacionit abdominal të janarit zbuluan se kanceri ishte i pranishëm.
"Siç mund ta imagjinoni, kjo ka marrë kohë," tha Kate për udhëtimin e saj shëndetësor në një video të postuar në llogaritë e saj dhe të William në mediat sociale. "Më është dashur kohë të shërohem nga një operacion i madh në mënyrë që të filloj trajtimin tim. Por, më e rëndësishmja, na është dashur kohë për t'u shpjeguar gjithçka George, Charlotte dhe Louis në një mënyrë që është e përshtatshme për ta dhe për t'i qetësuar ata ."
Kate shtoi se William, 41 vjeç, ka qenë "një burim i madh ngushëllimi dhe sigurie" gjatë këtij kapitulli sfidues.
“Shpresojmë se do ta kuptoni se si familje tani na duhet pak kohë, hapësirë dhe privatësi derisa të përfundoj trajtimin tim”, vazhdoi ajo. “Puna ime gjithmonë më ka sjellë një ndjenjë të thellë gëzimi dhe mezi pres të kthehem kur të jem në gjendje, por tani për tani duhet të fokusohem në rikuperimin e plotë”./Lapsi.al
