Policia ka zbardhur ngjarjen e ndodhur me datë 9 Shkurt, ku një dyqan celularësh në rrugën Myslym Shyri ra pre e një grabitjeje. 43-vjeçari Afrim Dulaj është shpallur në kërkim si autor i kësaj ngjarjeje ndërsa policia ka vënë në dispozicion 5 mijë euro për këdo që jep informacion për kapjen e tij.
Njoftimi i policisë:
Zbardhet dhe dokumentohet me prova ligjore, pas një pune intensive hetimore, nga Komisariati i Policisë Nr. 2, vjedhja e ndodhur më datë 09.02.2024, në një dyqan celularësh, në rrugën “Myslym Shyri”. Shpallet në kërkim një 43-vjeçar, si autor i dyshuar i kësaj ngjarjeje.
Shërbimet e Komisariatit të Policisë Nr. 2, në vijim të veprimeve për zbardhjen dhe dokumentimin e ngjarjes së ndodhur më datë 09.02.2024, në një dyqan celularësh, në rrugën “Myslym Shyri”, kanë vijuar hetimet e thelluara për identifikimin e autorit të rastit.
Si rezultat i punës intensive hetimore, u bë identifikimi dhe shpallja në kërkim e autorit të dyshuar, shtetasit Afrim Dulaj, i ditëlindjes 02.11.1980, banues në Tiranë.
DVP Tiranë fton qytetarët që të japin informacion për autorin e kësaj ngjarjeje dhe vendos shpërblim 5000 euro, për çdo informacion të vlefshëm që do të çojë në kapjen e tij.
