Një “objekt i rrezikshëm” i gjetur jashtë ambasadës izraelite në Stokholm është shkatërruar. Njoftimin e dha policia suedeze. Incidenti, i cilësuar si një "tentativë sulmi" nga ambasadori izraelit bëri që oficerët e policisë të rrethonin një zonë të gjerë aty pranë. Policia tha për BBC se ishte shumë herët për të dhënë detaje të mëtejshme mbi objektin. Ata thanë se askush nuk ishte lënduar.
Një zëdhënës i tha më vonë agjencisë së lajmeve AFP se stafi kishte gjetur një pajisje "live" dhe kishte njoftuar oficerët rreth orës 13:10 me kohën lokale. Objekti u vlerësua nga skuadra kombëtare e bombave, të cilët vendosën ta shkatërronin. Kryeministri suedez Ulf Kristersson tha se situata ishte "shumë serioze" dhe Shërbimi Suedez i Sigurisë po heton "kush është përgjegjës".
Mbikëqyrja e ambasadës dhe e institucioneve hebraike ishte përforcuar, shtoi Kristersson. Një zëdhënës i policisë tha për TV4 se pajisja ishte shpërthyer në mënyrë të kontrolluar. Tabloidet suedeze Expressen dhe Aftonbladet raportuan se bëhej fjalë për një granatë dore. Ndërkohë, transmetuesi kombëtar SVT tha se policia shkoi në vendngjarje dhe solli me vete thasë me rërë, që thuhet se do të përdoreshin gjatë asgjësimit të objektit.
Ambasadori izraelit në Suedi tha se kishte pasur një "tentativë sulmi" ndaj ambasadës dhe punonjësve të saj. “Ne nuk do të trembemi nga terrori” - shkroi Ziv Nevo Kulman në X. Ai falënderoi autoritetet suedeze për "veprimin e tyre të shpejtë".
Në postimin e saj, zëvendëskryeministrja e Suedisë, Ebba Busch tha se ishte "e tronditur" duke shtuar: "Urrejtja kundër Izraelit është e frikshme. Ekstremizmi i dhunshëm duhet të ndalet". Policia thotë se është duke hetuar dhe nuk ka thënë se kush mund ta ketë vendosur sendin e dyshimtë. Ambasada ndodhet në zonën e pasur Ostermalm të qendrës së qytetit të Stokholmit. ©LAPSI.al
