Një propozim për një armëpushim të ri në luftën Izrael-Hamas do të përfshinte tri faza, ka thënë një udhëheqës i lartë i Hamasit.
Udhëheqësi tha për Reuters se fazat do të përfshijnë lirimin e pengjeve të mbajtura nga grupi islamik.
Gratë, fëmijët, të moshuarit dhe të plagosurit do të liroheshin në fazën e parë, shtoi lideri i Hamasit.
Kujtojmë se më herët sot, Hamasi tha se do të studionte një propozim të ri për armëpushim në luftë.
Udhëheqësi i Hamasit, Ismail Haniyeh tha se grupi kishte marrë një propozim armëpushimi të paraqitur pas bisedimeve në Paris.
Ai tha se do të studionte planin dhe do të vizitonte Kajron për ta diskutuar atë.
Haniyeh nuk dha detaje për propozimin e armëpushimit, por ai pasoi bisedimet në Paris që përfshinin drejtorin e CIA-s, William Burns, kryeministrin e Katarit, shefin e shërbimit të inteligjencës izraelite Mossad dhe kreun e inteligjencës egjiptiane.
Kryeministri izraelit Benjamin Netanyahu ka thënë tashmë se forcat e tij nuk do të tërhiqen nga enklava derisa të kenë arritur “fitoren totale”.
