I izoluar në banesën e tij që prej 30 dhjetorit të vitit të kaluar, kur gjykata i caktoi masën "arrest në shtëpi", Sali Berisha është filmuar teksa ecën në verandën e banesës për të mbajtur trupin në lëvizje.
Filmimet tregojnë ish-kryeministrim që ka dalë në tarracën e banesës për të bërë ecje.
[video width="296" height="360" mp4="https://cdnimpuls.com/lapsi.al/wp-content/uploads/2024/01/Berisha-ne-tarrace.mp4"][/video]
Edhe pse është izoluar në shtëpi, aktiviteti politik i Berishës nuk është ndalur. Përkundrazi kreu i opozitës zhvillon çdo ditë një komunikim me mbështetësit e tij në rrugën "Mustafa Matohiti" dhe u flet nga dritarja e shtëpisë.
Së fundmi, SPAK i mohoi kreut të opozitës edhe pjesëmarrjen e tij në punimet e kuvendit, pasi ish-kryeministri kërkoi leje të shkojë dhe të bëhet pjesë e seancave parlamentare. Por sipas prokurorëve të SPAK, përderisa një qytetar i thjeshtë nuk mund të shkojë në punë kur është në arrest shtëpie, atëherë edhe deputeti nuk duhet të ketë të drejtë të bëhet pjesë e seancave parlamentare për sa kohë është në arrest shtëpie.
Nëse mungon 6 muaj në parlament pa arsye, Berishës i hiqet mandati.
Ish-kryeministri është në hetim lidhur me privatizimin e ish kompleksit Partizani. SPAK fillimisht i sekuestroi pasaportën dhe vendosi masën e arrestit detyrim paraqitje, por Berisha refuzoi t'i bindet me arsyetimin se prokurorët duhej më parë t'i drejtoheshin parlamentit për masën ndaj tij.
