“Romë, 7 janar 2024. Dhe duket si viti 1924”. Kështu nis një postim në rrjetet sociale i sekretares së Partisë Demokratike Italiane, Elly Schlein, i shoqëruar me një video që tregon një turmë njerëzish që nderojnë si fashistë.
Ngjarja që ka shkaktuar tërmet në politikën italiane ka ndodhur përpara ish-selisë së MSI-së në Romë ku janë kujtuar 3 të rinj nga Fronti i Rinisë që janë vrarë aty 46 vjet më parë. Mbrëmjen e 7 janarit, militantët e ekstremit të djathtë u mblodhën para ish-selisë qendrore të MSI-së për të përkujtuar Franco Bigonzetti, Francesco Ciavatta dhe Stefano Recchioni të vrarë në përleshjet e asaj kohe mes tyre dhe policisë.
MSI apo “Movimento Sociale Italiano” ishte një parti neofashiste e themeluar në 1946-ën, por që me kalimin e viteve u përça. Një pjesë e saj është sot anëtare e Fratelli D’Italia, partia e kryeministres Giorgia Meloni. Videoja vetëm disa dhjetëra sekonda, po bën xhiron e rrjeteve sociale. Gjatë paradites kishte pasur disa ceremoni ku kishte marrë pjesë edhe presidenti i rajonit të Lacios, Francesco Rocca.
Më pas, në mbrëmje u krye edhe riti i mbledhjes së grupeve neofashiste të cilët kujtojnë “të rënët e tyre” me qindra krahë të shtrirë që ngrihen lart. Reagimet më të forta i ka bërë Partia Demokratike e së majtës që e ka dënuar ngjarjen. Ajo kërkoi që ngjarja të dënohet edhe nga kryeministrja Meloni që deri tani ka heshtur. ©LAPSI.al
