Që kur ishte kthyer nga Belgjika, Gëzim Sinomataj dilte shpesh për të pirë cigare në ballkonin e shtëpisë së tij, në katin e tretë të një pallati në lagjen “Hajro Çakërri' në Vlorë. Nuk kish si ta dinte se ky ves do të shfrytëzohej për t’i marrë jetën.
Persona ende të panjohur po e prisnin me armë në dorë 23 vjeçarin, që ky të dilte për cigaren e radhës dhe rreth orës 22:00 e qëlluan me një plumb në kokë duke e lënë të vdekur në ballkon.
Viktima ishte djali i Sokol Sinomatajt, një ish-anëtar i bandës së Gaxhait që veproi në vitin 1997 në Vlorë. I ati është arrestuar për vrasjen e një personi në vitin 2000. Që në atë kohë, hakmarrja e ka ndjekur familjen Sinomataj. Dy vite më parë, xhaxhai të viktimës, Bernard Sinomatajt iu bë atentat me tritol.
Pas ngjarjes, autorët u larguan me një makinë BMë, e cila u gjet duke u djegur në lagjen “24 Maji”.
Mbetet e paqartë nëse hetuesit kanë arritur të gjejnë të dhëna të cilat mund t’i ndihmojnë në identifikimin e autorëve të kësaj ngjarjeje të rëndë.
22-vjeçari Sinomataj jetonte në Belgjikë dhe ishte kthyer për të kaluar vitin e ri në vendlindje, megjithëse ishte i ndërgjegjshëm se familja e tij ishte në hasmëri.
[video width="848" height="480" mp4="https://cdnimpuls.com/lapsi.al/wp-content/uploads/2024/01/Ballkoni-i-shtepise-ku-po-qendronte-Gezim-Sinomati.mp4"][/video]
Emri i tij, fatkeqësisht u lidh ngushtë me atë të xhaxhait të tij, të cilit i kishte marrë edhe emrin. 27 vite më parë, kur Gëzim Sinomati nuk kishte ardhur ende në jetë, iu vra xhaxhai. Ndaj edhe për nder të këtij të fundit, prindërit i vendosën emrin e tij. Por fatkeqësisht të përbashkët do të kishin edhe fatin.
Gëzim Sinomati (i madhi) u vra në vitin e mbrapshtë 1997 nga grupet kriminale që operonin në qytetin e Vlorës, por ekzekutimi i tij nuk u zbardh kurrë. Dje, 27 vite më vonë, për shkak të të njëjtave pazare të pambyllura u qëllua për vdekje edhe nipi i tij, vetëm 22 vjeç./Lapsi.al
