Këtë të martë pritet të jepet vendimi për ish-kryeministrin Sali Berisha për çështjen e privatizimit të kompleksit "Partizani". SPAK ka kërkuar një masë më e fortë për kryedemokratin, atë të 'arrestit në shtëpi'. Do të jetë shkalla e parë e GjKKO-s ajo që do të vendosë mbi fatin e Berishës. Ndërkohë pritet që sot seanca të jetë e gjatë, ndërsa do të mbahet me dyer të mbyllura. Pas miratimit të autorizimit nga Kuvendi për heqjen e lirisë së Sali Berishës, SPAK iu drejtua Gjykatës më datë 22 dhjetor duke i kërkuar ashpërsimin e masës së sigurisë për ish-kryeministrin.
Në kërkesën drejtuar GJKKO, Prokuroria e Posaçme kërkon masën “arrest shtëpie”. Ligji i jep 5 ditë Gjykatës, për të marrë në shqyrtimin kërkesën e SPAK dhe gjyqtarja Irena Gjoka pritet që në seancën gjyqësore të së martës të thërrasë për të dëgjuar palët. Në seancën plenare të 21 dhjetorit, Kuvendi mes tensioneve votoi dhënien e autorizimit për SPAK.
SPAK iu drejtua Gjykatës së Posaçme, pasi Sali Berisha e kundërshtoi vendimin e parë të detyrim paraqitjes, duke e konsideruar si antikushtetues. Berisha argumentoi se masa fillestare në ngarkim të tij nuk mund të zbatohej, pasi SPAK nuk kishte marrë më parë autorizim nga Kuvend. Por SPAK kundërshtoi duke thënë se masa për detyrim paraqitje ishte e një karakteri që konsiderohen kufizim dhe jo heqje lirie.
