Një këshilltar ka hedhur 2 granata në dyshemenë e mbledhjes së një këshilli fshati në Ukrainën perëndimore duke plagosur 26 persona, 6 nga të cilët janë në gjendje të rëndë. Sulmi ndodhi mëngjesin e së premten në selinë e këshillit të fshatit në Keretsky. Policia ende nuk ka komentuar për motivin e sulmit. Takimi po transmetohej drejtpërdrejt në Facebook kur ndodhi ngjarja.
Këshilltarët kishin zhvilluar një diskutim të ashpër për buxhetin e vitit 2024 si dhe për rezultatet financiare të këtij viti. Ata kishin mbajtur një votim për dhënien e një bonusi shefit të këshillit. Pothuajse 90 minuta pas mbledhjes, pamjet tregojnë një nga këshilltarët e fshatit duke bërtitur dhe duke kundërshtuar buxhetin. Burri, i veshur me një xhaketë të errët, më pas largohet nga dhoma, duke marrë me vete një person tjetër. Pak minuta më vonë ai kthehet dhe qëndron para derës.
Menjëherë pas kësaj ai nxjerr disa granata nga xhepat e xhaketës. Ai përpiqet shkurtimisht të tërheqë vëmendjen e njerëzve, duke thënë "Mund të mundem?", - përpara se të hedhë granatat në mes të dhomës. Pak çaste më vonë ato shpërthejnë. Një nga të plagosurit rëndë është edhe njeriu që hodhi granatat.
Shumë ukrainas kanë akses në armatim për shkak të luftës, por ende nuk ka prova që sulmi ishte i lidhur me konfliktin. Keretsky është një fshat me rreth 4 mijë banorë jo shumë larg kufirit hungarez. Policia ukrainase thotë se shërbimi i sigurisë SBU do të hetojë incidentin si një "sulm terrorist". ©LAPSI.al
