Në programin e festivalit mbarëkombëtar të teatrit “Moisiu”, që është publikuar në fasadën e Arturbinës dallohet se Altin Basha, që aktualisht mban postin e drejtorit të Teatrit Kombëtar vjen në konkurim edhe si regjisor i teatrit të Gjakovës me shfaqjen “Masë për masë”.
Me pak fjalë, z. Basha është edhe mikpritës në cilësinë e drejtorit të Teatrit Kombëtar të Tiranës, por është edhe mik, pra i ftuar si regjisor i Teatrit të Gjakovës.
Klonimi që në këtë rast i ka bërë vetes Altin Basha, e lejon atë që një pjesë të fondeve që i besohen nga taksapaguesit si drejtor i teatrit t’i përdorë për të ftuar veten në festival.
Sigurisht që nëse Altini drejtor e shpërblen me një çmim Altinin regjisor, zemërgjerësia mes kloneve do të ishte për t’u patur zili.
Në këtë rast, do të thuhej se Altini, drejtor i Tiranes e priti siç i ka hije Altinin regjisor nga Gjakova.
Por ndërsa Altini regjisor i Gjakovës do të meritonte një Bravo të madhe për çmimin, lind pyetja: Çfarë do t'i mbetej Altinit drejtor të Teatrit Kombëtar të Tiranës?
Sepse për t'u prezantuar si regjisor, Altin Basha punoi në Gjakovë përgjatë muajve shtator dhe tetor, duke e lënë pas dore detyrën si drejtor në Tiranë.
Dhe kjo nuk është hera e parë që Altini drejtor i hap rrugë Altinit regjisor.
Gjatë muajve të verës, në qershor dhe në korrik për shfaqjen “Mama mia” Altini regjisor sërish la pa punë Altinin drejtor. Pak rëndësi ka se regjisorët e tjerë enden në kërkim të sallave të munguara dhe shfaqjet e tyre nuk vihen në skenën e Tiranës. Altini drejtor ka punë për të bërë dhe Altini regjisor është prioritet.
Majde kur u kthye nga Gjakova, Altini regjisor nuk humbi kohë por nisi shfaqjen “E kuqja” në Teatrin Eksperimental. Premiera do të nisë në nëntor. Fondet këtë herë i mori nga drejtori Prevazi që e ka zyrën një kat më lart tij.
Ndërkohë në fasadën e Arturbinës është varur një poster i ri me titull: “Martesë me kushte”. Edhe kjo premierë vjen sërish nga i njëjti regjisor Altin Basha. Premierë ka emrin, sepse në realitet bëhet fjalë për rivënien e shfaqjes “Çifti i shqyer”.
Por që të marë fondet si premierë në këtë rast i është ndërruar tituli.
Kjo shfaqje do të nisë menjëherë pas festivalit duke okupuar sërish sallën e vetme të Teatrit Kombëtar, si ekskluzivitet i regjisorit Altin Basha.
Për këtë pushtim të skenave nga Altini regjisor nuk ka asnjë reagim nga Bordi drejtues i Teatrit.
Për më tepër, çdo artist e ka të qartë se për vënien e një shfaqjeje në skenë duhet kohë, të paktën 2 muaj angazhim.
Por që nga qershori, Altin Basha e ka bërë natën ditë me 4 premiera në 5 muaj.
Sa në Amfiteatër, sa në Gjakove, sa tek Teatri Eksperimental, a dihet gjë: Kush e drejton sot Teatrin Kombëtar?
