Detaje të reja kanë dalë nga ngjarja e rëndë në Lezhë, ku drejtuesi i një furgoni u qëllua me armë zjarri pas një sherri me një person tjetër.
Mësohet se autori qëlloi tre plumba në drejtim të shoferit në momentin që ai ndodhej brenda mjetit të mbushur me pasagjerë.
I plagosuri nga Laçi është dërguar në spital ku ndodhet nën kujdesin e mjekëve, ndërsa ende nuk dihet gjendja e tij shëndetësore.
Raportohet se shoferi bënte linjën e pasagjerëve Laç-Lezhë dhe anasjelltas. Ngjarja ndodhi paraditen e sotme pranë tregut të qytetit.
Autori është identifikuar nga policia dhe po punohet për kapjen e tij. Ende nuk dihen shkaqet e ngjarjes.
Njoftimi i policisë
Rreth orës 11:00, në qytet Lezhë, në afërsi të shinave të trenit, gjatë një konflikti të çastit që dyshohet për parkimin e automjeteve, shtetasi Marjan Kola, banues në Kurbin, ka plagosur me armë zjarri shtetasin Tonin Ndreca 35 vjeç, banues në Laç, i cili ndodhet në spital jashtë rrezikut për jetën.
Autori i dyshuar është larguar menjëherë pas ngjarjes dhe vijon ndjekja nga ana e shërbimeve të Policisë për lokalizimin dhe kapjen e tij.
Në vendngjarje, grupi hetimor nën drejtimin e Prokurorisë, po kryen veprimet hetimore për zbardhjen e rrethanave të ngjarjes dhe dokumentimin ligjor.
