Prokuroria e Posaçme kundër Korrupsionit dhe Krimit të Organizuar, i është drejtuar GJKKO me kërkesën për masën “arest me burg”, për oficeren Jonida Babameto, e cila doli në dosjen e SPAK nga përgjimet e “SKY”.
Babameto doli në mesazhet e aplikacionit “SKY”, duke komunikuar me shefin e krimeve Dedan Gjoni, të cilit i dërgonte informacione nga sistemi i Interpolit për persona të ndryshëm. Besohet se informacion nga ky sistem, Babameto i ka dërguar Gjonit edhe për vëllezërit Nela, të cilët ishin planifikuar të vriteshin nga ky grup.
“Verifikimin e kushteve të zbatimit të masës së sigurimit personal me karakter shtrëngues “Ndalimi i daljes jashtë shtetit” dhe “Detyrimi për t’u paraqitur në policinë gjyqësore”, parashikuar nga neni 233 dhe 234 i K.Pr.Penale të dhënë ndaj personit nën hetim J.B. me vendimin Nr.124, datë 17.11.2023 të Gjykatës së Posaçme të Shkallës së Parë për Korrupsionin dhe Krimin e Organizuar dhe vazhdimin e zbatimit të këtyre masave. Urdhërohet personi nën hetim J.B. të mos largohet nga territori i Republikës së Shqipërisë pa autorizimin e gjykatës.
Ndalohet përdorimi i pasaportës dhe dokumenteve të tjerë identifikues të vlefshme për daljen jashtë shtetit për personi nën hetim J. B. Urdhërohet personi nën hetim J.B. të paraqitet në policinë gjyqësore pranë prokurorisë, të enjten e fundit të çdo muaji, ora 13.00. Urdhërohet Prokuroria e Posaçme kundër Korrupsionit dhe Krimit të Organizuar dhe Policia Gjyqësore për ndjekjen edhe zbatimin e këtij vendimi.
Kundër këtij vendimi lejohet ankim në Gjykatën e Posaçme të Apelit për Korrupsionin dhe Krimin e Organizuar brenda 5 ditëve, duke filluar ky afat nga e nesërmja e komunikimit të vendimit”, thuhet në njoftimin e GJKKO.
