Në orën 09:00 të së hënës është caktuar seanca gjyqësore në Apelin e GJKKO për Sali Berishën. Në këtë seancë pritet që gjykata të vendosë për masën e sigurisë ndaj ish-kryeministrit të vendit të ankimuar nga dy avokatët e tij. Gjykata e Posaçme kishte vendosur më herët masën detyrim paraqitje dhe ndalim i daljes jashtë shtetit. Berisha nuk e ka pranuar vendimin e gjyqtares Irena Gjoka duke e konsideruar atë në kundërshtim me Kushtetutën. Për këtë edhe i është drejtuar gjykatës së Apelit.
Po të hënën në orën 10.00, Berisha do të duhet të paraqitet sipas urdhëresës, në SPAK. Në seancën e parë Berisha nuk pranoi që të shkonte. Sipas tij, gjykata duhet më parë të merrte lejen e Kuvendit. Të gjitha pikëpyetjet janë se çfarë do të ndodhë nëse Berisha nuk paraqitet edhe këtë herë. Juristët janë shprehur se një pjesë të çështjes pritet ta zgjidhë gjykata e Apelit.
Nëse ai pranon ankimimin e avokatëve dhe rrëzon masën e sigurisë, atëherë thirrja e Berishës në orën 10:00 në SPAK bëhet e pavlefshme. Ndërkohë, nëse Apeli lë në fuqi vendimin ndaj tij, dhe ish-kryeministri nuk paraqitet, atëherë SPAK ka të drejtë të kërkojë ashpërsim mase, por që kjo të ndodhë, do duhet të kërkojë autorizim në Kuvend. ©LAPSI.al
