Kryeministri shqiptar Edi Rama vijon përpjekjen e tij për të bindur italianët për marrëveshjen e firmosur me homologen Giorgia Meloni për marrjen e emigrantëve afrikanë.
“Ato që do të ndërtohen në Shqipëri janë qendra pritjeje sipas rregullave europiane. Në Greqi ka më shumë se një, në Itali ka më shumë se një. Por nëse e njëjta gjë bëhet në Shqipëri, flasim për Guantanamon. Është një qendër pritjeje në një vend që nuk është në BE, por është një vend europian”, - është shprehur kryeministri shqiptar në një intervistë për Tg2 Post të RAI-it. Madje, siç bën zakonisht, i ka dhënë edhe mend Europës për çështjen e azilantëve.
“Nëse një vend europian kërkon të bëjmë diçka së bashku dhe shkakton gjithë këtë protestë, kjo tregon mungesë serioziteti në trajtimin e vetë problemit të migracionit. Askush nuk ka dhënë zgjidhje deri tani, nuk ka ndarje. Dhe më pas kjo marrëveshje etiketohet si rrëmujë. Shqipëria nuk mund të ofrojë zgjidhje, por le të japim një dorë. Nëse Italia na pyet, ne nuk mendojmë për një mister apo një komplot: nëse funksionon, do të jetë e dobishme. Sepse migrimi nuk është një luftë e Italisë apo e Shqipërisë, është një luftë e gjithë Europës kundër një fenomeni që po bëhet gjithnjë e më i madh” – është shprehur Rama.
Për Ramën, polemikat janë të pakuptueshme "sepse nuk kemi bërë asgjë kaq të bujshme", është e nevojshme të luftohet imigracioni i paligjshëm dhe trafikantët, por në të njëjtën kohë ai është "i hapur ndaj flukseve të ligjshme të punës. Nëse kjo metodë, kjo qasje e dyfishtë, nuk miratohet, Evropa nuk do ta bëjë atë. Të mbyllësh gjithçka është e kotë. Hapja pa kriter mund të bëhet shumë e rrezikshme”, - theksoi Rama duke u shprehur se në vend që të bëjnë polemika, vendet e Europës “duhet të rreshtohen në të njëjtin drejtim, përndryshe do të fundosemi të gjithë”.
Vlen të theksohet se Rama ende nuk ka thënë e as ka shkruar asnjë fjalë në shqip për këtë çështje. ©LAPSI.al
