Komentet e shumta që ditët e fundit, kryeministri shqiptar Edi Rama ka bërë për pothuajse të gjitha mediat italiane mbi marrëveshjen me Giorgia Melonin janë bërë pjesë e “talk show”-t të njohur “Propagandalive” që transmetohet mbrëmjen e së premtes në televizionin La7.
Ishte pikërisht marrëveshja mes Shqipërisë dhe Italisë për emigrantët ajo që ka zënë një pjesë të madhe të këtij emisioni. Komikët italiane kanë marrë në analizë me mjaft humor deklaratat e Ramës dhe Melonit për këtë çështje.
Kështu për shembull, fjalia që Edi Rama e përsërit shpesh se “marrjen e emigrantëve ia kanë kërkuar edhe shtete të tjera europiane, por ai ka refuzuar”, artisti Marco Dambrosio (Makkox) e ka krahasuar me fjalët e një shitësi makinash të përdorura: “Ma kanë kërkuar edhe të tjerë, por nuk e kam dhënë lirë”.
Pjesë e shakave ishte edhe Shëngjini që sipas italianëve mund të përkthehej në "Shën Gjini"apo ndryshe, "San Giovanni di Medua".
Francesca Schianchi kishte gjithashtu një monolog për këtë çështje.
Nuk munguan as montazhet në studio. ©LAPSI.al
