Zv. kryeministrja Belinda Balluku tha se marrëveshja e firmosur me Italinë për refugjatët do të kalojë në parlament dhe nuk është në fazën përfundimtare.
Në një konferencë të përbashkët me ambasadorin e BE, Soreca për publikimin e progres-raportit të KE për Shqipërinë, Balluku u shpreh se marrëveshja e firmosur nga kryeministri Rama është ndërkombëtare dhe transparente.
“Marrëveshja e firmosur nga kryeministri në Romë ka kaluar në qeveri të gjithë procesin e parashikuar dhe do të shkojë në parlamentin shqiptar për t’u ratifikuar, nuk e ka përfunduar rrugëtimin e saj.
Kryeministri ka bërë të qartë dhe askush nuk duhet të shqetësohet as për qëllimin dhe as kornizën juridike të saj pasi respekton të drejtën ndërkombëtare dhe detyrimin e palëve.
Nëse do të ishte një marrëveshje mes dy vendeve të BE do të ishte gjithçka normale. por ne jemi në solidaritet me Italinë.
Na vjen keq që ka politikanë shqiptarë që arrijnë deri në pikën që merren me ngjyrën e lëkurës së emigrantëve që do të strehohen këtu. Ne jemi popull që e kemi vuajtur emigrimin dhe e dimë që do të ishim në një situatë tjetër nëse nuk do të ishim shpëtuar nga Italia në vitet 90”, tha Balluku.
