Policia e Kosovës ka publikuar pamjet nga një grabitje e armatosur që ka ndodhur në orët e para të mëngjesit të së premtes në afërsi të një pike karburanti në Ferizaj. Ngjarja ndodhi rreth orës 04:50 kur u dha alarmi se persona të panjohur po kryenin një grabitje. Në vendin e ngjarjes ka mbërritur një patrullë e policisë e cila është qëlluar me armë nga grabitësit.
Autorët kanë hapur zjarr në drejtim të makinës së policisë, duke i shkaktuar asaj dëme, por fatmirësisht 2 policët që ishin në të nuk kanë pësuar ndonjë lëndim trupor. Shkëmbimit të zjarrit i janë përgjigjur edhe zyrtarët e policisë. Të dyshuarit janë larguar nga vendi i ngjarjes me një veturë karavan, ngjyrë e zezë, në drejtim të panjohur. Në veturë dyshohet se ishin 4 persona me armë të gjata.
Ekipe të policisë kanë shkuar menjëherë në vendin e ngjarjes. Nga hetimet e para mësohet se synimi i personave të maskuar dhe të armatosur ishin 3 bankomate që gjenden në anë të rrugës kryesore në parkingun e qendrës tregtare "Superviva" në Ferizaj. Personat e maskuar fillimisht kanë shpërthyer me lëndë plasëse njërin bankomat, ndërsa kanë dëmtuar edhe dy bankomatët tjerë.
Falë ndërhyrjes së shpejtë të policisë së Kosovës e cila mbërriti në kohë, të dyshuarit hapën zjarr në drejtim të veturës së policisë dhe u larguan nga vendi i ngjarjes. Hetuesit kanë kryer egzaminimet në vendin e ngjarjes, në bashkëpunim edhe me njësitet tjera të policisë rajonale dhe janë në kërkim të personave të dyshuar.
Rasti është cilësuar si “Vrasje e mbetur në tentativë, grabitje e armatosur e mbetur në tentativë dhe armëmbajtje pa leje”. Policia fton qytetarët që të bashkëpunojnë më policinë nëse kanë informata për personat e dyshuar që lidhen me grabitjen e armatosur. ©LAPSI.al
