Në seancën e kësaj të enjteje në parlament do të duhej të votoheshin edhe ndryshimet në përbërjen e Komisionit të Reformës Zgjedhore mandati i të cilit u shty edhe me 6 muaj të tjerë në seancën e një jave më parë.
Në këtë komision të ngritur që gati 2 vjet më parë dhe që është mbledhur më pak se gishtat e një dore, PD-ja përfaqësohet me Enkelejd Alibeajn që është edhe bashkëkryetar si dhe anëtarët: Oerd Bylykbashi, Dashnor Sula, Grida Duma, Kreshnik Çollaku dhe Lindita Metaliaj.
Nga këta, Duma është larguar fare nga Kuvendi pasi la mandatin ndërsa Lulzim Bashës i ka mbetur vetëm Alibeaj dhe Çollaku pasi të tjerët ose kanë kaluar me Berishën ose nuk i binden më. Në këtë situatë, Basha kërkon të caktojë njerëzit e tij në këtë komision ndërsa Gazmend Bardhi thotë se të drejtën për t’u përfaqësuar e ka grupi që drejtohet prej tij dhe që është shumicë.
Të dyja krahët në PD kanë propozuar emrat e tyre. Grupimi i Bardhit ka propozuar që në vend të Alibeajt si bashkëkryetar të jetë Oerd Bylykbashi. Ndërkohë mazhoranca duket se po vijon lojën e përçarjes. Në njërën anë njeh Bardhin si kryetar të Grupit Parlamentar të PD-së, në krahun tjetër njeh Bashën si kryetar të PD-së. Këtë lojë e vijoi edhe seancën e së enjtes.
Mazhoranca vendoi ta shtyjë miratimin e përbërjes së re të komisionit duke bërë që të reagojnë ashpër përfaqësuesit e PD-së që njohin Gazmend Bardhin si kryetar të grupit parlamentar. Ky i fundit aludoi se ka një pazar të fshehtë mes Ramës dhe Bashës që në komisionin e reformës të shkojnë deputetë të PD-së së vulës.
“Bëni teatër në mëngjes, që gjoja jeni në konflikt, se po zihet një koleg i joni që ka vendosur të keqpërdoret në këtë histori me kryetaren e Kuvendit që të vini tani në darkë dhe të na thoni ne, siç në fakt e keni marrë tashmë vendimin se përfaqësuesit e opozitës në komisionin e reformës zgjedhore nuk do t’i caktojmë ne të nderuar kolegë, por do të na i caktojë ky krahu këtej – tha Bardhi në seancë duke kërkuar ndërprerjen e saj që ai të mblidhte grupin parlamentar.
Me rikthimin nga pushimi, deputetët e opozitës kishin bllokuar foltoren dhe vendet ku ulen ministrat duke bërë që kryetarja Nikolla të deklarojë mbylljen e seancës. Një reagim të fortë bëri edhe Sali Berisha pas mbylljes së seancës.
“Ky përbën një atentat vdekjeprurës për pluralizmin parlamentar. Deputetë e opozitës bënë të pamundurën për të bllokuar këtë votim. Puçistët shtynë votimin për një javë. Jemi në prag të një situate që nuk ka ekzistuar kurrë në këtë parlament” – tha Berisha. ©LAPSI.al
LEXO EDHE: Luftë “kullash” në PD/ Bardhi: Basha porositi dy kate në zonën më të shtrenjtë në Tiranë
