Deputeti i Lëvizjes Vetëvendosje, Ardian Gola i ka kërkuar kryeministrit të Shqipërisë të përmendë në mënyrë të qartë se Serbia është orkestruese e sulmit terrorist në veri të Kosovës, të kërkojë një mbledhje të OKB-së enkas për këtë sulm terrorist dhe të tërhiqet nga kërkesa e tij për një konferencë ndërkombëtare për veriun.
Mesazhin e tij për Ramën, deputeti i Vetëvendosjes e shoqëron me titullin e mediave online mbi lajmin se kryeministri i Shqipërisë nuk ka qenë dakort me deklaratën e Bashkimit Europian të datës 19 shtator.
“Kish bo fillimisht që ti mos me kërku konferencë ndërkombëtare për veriun, me qene eksplicit në përmendjen e Serbisë si orkestruese e sulmit terrorist, me fillu ofensive diplomatike përmes ministrave, veçanërisht atij të jashtëm dhe ambasadave, për t'i sensibilizuar vendet mike dhe me gjere, me kërku mbledhje të OKB-se enkas për këtë sulm të sponsorizuar terrorist të Serbisë... e qeshtu. Përndryshe, bëhet vonë” shkruan Gola në statusin e tij në Facebook.
