Presidenti Begaj ka shkarkuar nga detyra Komandantin e Forcës Ajrore, Gjeneral Brigade, Ylli Pulaj. Në këtë detyrë është emëruar Ferdinant Dimon.
Shkarkimi i Pulajt është bërë me propozim të ministrit të mbrojtjes Niko Peleshi dhe më pas Begaj ka nënshkruar dekretin.
Dekreti për shkarkimin e Ylli Pulajt vjen pas një raportimi në media se Byroja Kombëtare e Hetimit i sekuestroi celularin në kuadër të hetimit për dhënien e pronave të ushtrisë për oligarkët. Për të njëjtin hetim është marrë në pyetje disa herë edhe ish ministrja e mbrojtjes Olta Xhaçka, që një ditë më parë u shkarkua nga qeveria si ministre e jashtme.
Një muaj më parë, portali Oligarkia.al raportoi se në zyrën e komandantit të Forcës Ajrore, Ylli Pulajt mbërritën tre agjentë të Byrosë Kombëtare të Hetimit të cilët i paraqitën urdhërin e gjykatës për sekuestrimin e celularit të tij.
Veç zotit Pulaj, SPAK ka sekuestruar telefonat edhe drejtuesve të tjerë të niveleve më të ulëta të forcës ajrore dhe disa drejtorëve civilë në ministrinë e Mbrojtjes.
Arsyet e bastisjes në masë lidhen me një sërë tenderash të ushtrisë, ku dyshohet për korrupsion galopant, por edhe me masakrën e tjetërsimit të pronave të saj, kryesisht gjatë kohës që ministria e Mbrojtjes drejtohej nga Olta Xhaçka.
https://lapsi.al/2023/03/13/dokumenti-mecollari-perballe-xhackes-per-kalimin-e-pronave-te-ushtrise-tek-privati/
