Një zjarr masiv ka përfshirë kodrat me ullinj fshatin Zhamë në Lushnjë. Nga flakët janë të rrezikuara edhe disa banesa.
Raportohet se në këtë zonë terreni është i vështirë ndërsa zjarrfikësit po punojnë për të neutralizuar flakët. Dhjetëra hektarë ullishte janë nën pushtetin e flakëve.
Forca të policisë kanë shkuar në ndihmë të zjarrfikëses. Burime nga terreni thonë se situata është tepër e vështirë dhe se mënyra më e mirë për të ndërhyrë është nga ajri. Policia njoftoi se ka arrestuar një 58-vjeçar si shkaktar të zjarrit.
"Strukturat e Komisariatit të Policisë Lushnjë, menjëherë pas marrjes së njoftimit se në fshatin Zham ka rënë zjarr, bënë të mundur identifikimin dhe shoqërimin në Komisariat të autorit të dyshurar të zjarrvënies.
U shoqërua dhe po kryhen veprimet e mëtjeshme hetimore procedurale për shtetasin Ramadan Zoga, 58 vjeç, i cili ka ndezur zjarr për të djegur mbeturinat dhe zjarri ka dalë jashtë kontrollit dhe si pasojë e përhapjes së flakëve është djegur një sipërfaqe e konsiderueshme toke me ullinj dhe pemë të ndryshme në fshatin Zham.
Në vendngjarje ndodhet grupi i drejtimit të DVP Fier, shërbimet e Policisë Fier, disa grupe të Forcave të Ndërhyrjes së Shpejtë Fier dhe shërbimet zjarrëfikëse të cilat po punojnë për shuarjen e zjarrit. Vijon puna për dokumentimin e plotë të rrethanave të rënies së zjarrit dhe vënien para përgjegjësisë penale të autorëve të dyshuar.
Drejtoria Vendore e Policisë Fier apelon për të gjithë banorët, që në asnjë rast të mos ndezin zjarre, pasi do të përballen me ligjin. Policia fton qytetarët që të denoncojnë në numrin 112, për çdo rast të zjarrvënies apo të paligjshmërisë në tërësi, duke iu garantuar anonimatin dhe reagim të shpejtë e të paanshëm nga strukturat policore" - thuhet në njoftimin e policisë. /LAPSI.al
[video width="848" height="480" mp4="https://cdnimpuls.com/lapsi.al/wp-content/uploads/2023/09/WhatsApp-Video-2023-09-05-at-20.01.38.mp4"][/video]
[video width="640" height="362" mp4="https://cdnimpuls.com/lapsi.al/wp-content/uploads/2023/09/WhatsApp-Video-2023-09-05-at-20.01.39.mp4"][/video]
