Tashmë prej vitesh kryeministri Edi Rama i zbulon ndryshimet në qeveri LIVE në TV. Është aq qesharak ky moment saqë edhe vetë ministrat e rinj apo të konfirmuar e mësojnë nga TV ose në sallë “fatin e tyre”. kështu ndodhi edhe këtë të hënë në mbledhjen e Asamblesë Kombëtare të PS-së.
Në fund të fjalimit 90-minutësh, Rama e kaloi në 30 sekonda pjesën më të rëndësishme, atë të lëvizjeve në kabinetin qeveritar. Në një video që LAPSI.al ka vëzhguar me kujdes shihet se si kanë reaguar ministrat kur morën vesh gradimin apo lënien jashtë qeverisë.
[video width="640" height="362" mp4="https://cdnimpuls.com/lapsi.al/wp-content/uploads/2023/09/WhatsApp-Video-2023-09-04-at-23.21.35.mp4"][/video]
Anila Denaj rikthehet në qeveri si ministre Bujqësisë dhe Zhvillimit Rural. Ajo kthehet e habitur nga ish-ministrja Etilda Gjonaj duke i thënë diçka ndërsa ajo e uron për detyrën e re.
Pas tyre duket Delina Ibrahimaj. Ministrja e Financave ka një buzëqeshje në fytyrë pasi mësoi katapultimin në një ministri pa peshë si ajo për sipërmarrjen.
Në krah të Ibrahimajt qëndron Frida Krifca që nuk pati një fat më të mirë. Ajo u largua nga qeveria, por shihet të buzëqeshë dhe të duartrokasë.
Në rreshtin e dytë duket Olta Xhaçka. Pas pak ditësh ajo do të ulej në tryezën e Këshillit të Sigurimit të OKB-së në Nju Jork, por në vend të saj do të shkojë Igli Hasani. Pa grim në fytyrë, Xhaçka duket që shkel syrin dikujt si për t’i thënë “nuk ka problem”.
Pak më tek, po në rreshtin e dytë qëndron e ngrirë Ogerta Manastirliu që duhet të lërë ministrinë e Shëndetësisë për atë të Arsimit.
Më e kënaqura duket zëvendëskryeministrja Belinda Balluku që u konfirmua si “numri 2” i qeverisë. Ajo bën batuta me Namik Doklen ndërsa në një moment ndërhyn edhe Erion Veliaj.
Ai që duket më i relaksuari është Taulant Balla që ndoshta e dinte se emri i tij nuk do të përmendej ndaj nuk e ka problem t’i shkelë syrin kamerës.
Shpresojmë të jesh kaq i qetë edhe herën tjetër Taulant!!! ©LAPSI.al
[video width="576" height="336" mp4="https://cdnimpuls.com/lapsi.al/wp-content/uploads/2023/09/WhatsApp-Video-2023-09-04-at-23.32.01.mp4"][/video]
