Kompleksi në Fushë-Kuqe, i cili dyshohet se është baza e një rrjeti kriminal droge që u godit të martën (15 gusht) nga një operacion i përbashkët i Guardia di Finanza, DEA-s amerikane dhe policisë shqiptare, rezulton në pronësi të një të dënuari për heroinë.
Ky person është i shpallur në kërkim ndërkombëtar për trafik heroine.
Në kompleksin luksoz janë kryer kontrolle edhe përgjatë ditës së sotme (16 gusht). Gjatë aksionit policor u arrestuan 6 persona, mes tyre edhe ish-efektivi i policisë, Ardit Ismailuka.
Këtij të fundit i janë gjetur 10 milionë lekë kesh, ndërsa në një konferencë për mediat, zëvendësdrejtori i policisë refuzoi të sqaronte nëse ish-polici ka lidhje me këtë grup kriminal.
Emrat e të arrestuarve, mes tyre dy shtetas nga Ukraina:
Arlind Ismailukaj, 47 vjeç, banues në Tiranë;
Armando Mema, 37 vjeç, banues në Tiranë;
Nerim Çela, 40 vjeç, banues në Fushë Kuqe, Laç;
Besnik Brokeri, 51 vjeç, banues në Vlorë;
Kyrylo Ponomarenko, 39 vjeç, banues në Ukrainë;
Kostiantyn Biellon, 44 vjeç, banues në Ukrainë.
Disa prej të arrestuarve kanë refuzuar që të japin shpjegime, pavarësisht tentativës së oficerëve.
Policia sqaroi se operacioni filloi pas njoftimit të strukturave monitoruese në terren, për lëvizjen me shpejtësi të një mjeti lundrues, nga laguna e Patokut me drejtim jug-perëndimin.
“Ky mjet lundrues është afruar pranë një tjetër mjeti lundrues tip veliere dhe më pas shtetasit që ishin në këto mjete lundruese, kanë shkëmbyer lëndë narkotike”, sqaruan uniformat blu.
Shtetasit që ndodheshin në velerie, sapo kanë konstatuar se ishin rrethuar nga Policia, i kanë vënë zjarrin mjetit lundrues dhe kanë tentuar të largohen me një barkë të vogël shpëtimi, por janë kapur në flagrancë.
