Meme me të cilën Edi Rama i krahasonte shqiptarët që iknin në Itali në vitin 1991, me turistët italianë që vijnë për pushime në vendin tonë, mori vëmëndjen e mediave italiane. Por së fundi, një shkrim në Corriere della Sera bie në sy për hartimin e një profili plot ngjyra që i bën Edi Ramës.
Nga fillimi në fund, shkrimi është mbushur me lavde dhe furça për Ramën, por në fund, me takt gazetari ka hedhur idenë e Veliajt si pasardhës të Ramës, ndërsa parashikon se anëtarësimi në BE i Shqipërisë mund të jetë sfida e fundit politike e Ramës.
“Anëtarësimi në Bashkimin Evropian është ndoshta sfida e fundit e Ramës, përpara largimit nga politika. Ata që e njohin mirë thonë se do që të mbahet mend jo vetëm si ai që e zhvilloi vendin, por edhe si ai që çoi vendin në duar më të sigurta dhe më të besueshme: ato të Bashkimit Evropian. Zyrtarisht, kryeministri shqiptar nuk ka caktuar një ‘pasardhës’, ai njihet si shumë i rreptë me të gjithë ministrat e tij, por të gjithë sytë janë tek Erion Veliaj, 43 vjeç, kryetar i Bashkisë së Tiranës që prej vitit 2015-të, ish-ministër i Mirëqenies Sociale dhe Rinisë në qeverinë Rama. Ka mbaruar studimet universitare jashtë vendit, me një rrjet njohjesh ndërkombëtare për t’u patur zili. Dhe, sigurisht, shumë aktiv në shoqëri”, mbyllet profili politik i Kryeministrit Edi Rama në “Corriere della Sera”.
Në fakt, ky parashikim që bën gazetari për momentin është i parakohshëm. E para se Rama është gjallë dhe gëzon shëndet të plotë. Madje shpesh ai dëgjohet të thotë se po punon për "Shqipërinë 2030", pra është ende herët për t'ia caktuar trashëgimtarin, vetëm nëse nuk i dëshiron humbjen. E dyta është e vërtetë se të gjithë sytë janë tek Erjon Veliaj, por jo për ndonjë trashëgimi që i vjen peshqesh nga Surreli. Me shumë interes, pritet hapi i SPAK për aferën e inceneratorit të Tiranës, ku Veliaj ka hedhur firmën duke marrë si angazhim financiar pagesën e 91 milion eurove, edhe pse kjo nuk ishte kompetencë e tij, por e Këshillit Bashkiak.
Prandaj sytë e të gjithëve janë nga Erjon Veliaj, nëse ai do t'i përgjigjet hetimeve të SPAK siç bëri me burrëri Lefter Koka dhe Alqi Bllako, apo do preferojë ta sodisë gjyqin e tij diku jashtë, siç bëri Arben Ahmetaj? Për trashëgiminë e Ramës, ka kohë ende.
