“Tirana s’ka më parqe, s'ka më pemë”. Ishte kjo thirrja e protestuesve nga “Lëvizja Bashkë”, të cilët kanë protestuar për të mbrojtur parkun mes pallateve 9-Katëshe dhe Teatrit të Operës dhe Baletit ku do të ndërtohet një tjetër kullë shumëkatëshe.
“Këta ulërasin do të bëjmë Dubain, por Dubai ngrihet mbi asgjë. Hiqni dorë, mos ju bindni një njeriu pa dinjitet. Çdo pallat që ngrihet në Tiranë është një vrasje”, - u shpreh një protestues.
Ndërsa Pedagogu Ervin Goci pjesë e kësaj proteste u shpreh se ky sistem nuk do të ndalojë deri sa të ndërtojë në çdo cep të vendit.
“Kjo kauzë dhe shumë kauza të tjera, ndërtimi në Tiranë nuk ka asnjë dallim nga inceneratori. Skema e inceneratorëve ndoshta është më e shpejtë, por skema të tilla janë grabitje. Toka këtu është pasuri publike, siç mbrohen taksat duhet mbrojtur edhe prona”, - tha ai.
Kryetari i “Lëvizjes Bashkë”, Arlind Qori tha se kullat janë për të pastruar paratë e drogës e korrupsionit.
“Tirana është një nga më të varfrat në Ballkan. Këto hotele të pafundme nuk do ti shërbejnë konsumatorëve, se Tirana është një qytet i varfër. Këto kulla kanë një funksion; të pastrojnë paratë e drogës, paratë e korrupsionit, këto kulla jo vetëm po shkatërrojnë qytetarin, por nuk do të kenë asnjë minimum funksionaliteti.
Kush blen zyra, apartamente në këtë qytet që po zbrazet? Fatkeqësia e Tiranës ka një qeveri nga hajdutë e përbindësha. Ka një sistem të përbërë nga parti të vjetra që përbëjnë nga të njëjtët oligarkë”, - tha Arlind Qori.
Protestuesit rrëzuan një pjesë prej rrethueseve dhe tentuan të heqin edhe tabelën, por në këtë moment ka ndërhyrë policia që nuk i ka lejuar. ©LAPSI.al
